Ամուլսարի հանքավայրը կշահագործվի առաջիկայում

Ամուլսարի ոսկու հանքի ծրագրի շրջանակում «Լիդիան Արմենիա» ընկերությունը, ՀՀ կառավարությունը՝ ի դեմս Էկոնոմիկայի նախարարության, և Ջերմուկ, Վայք, Սիսիան համայնքները համաձայնագիր են կնքել։ Էկոնոմիկայի նախարարը հայտարարել է, որ Ամուլսարի հանքավայրը կշահագործվի առաջիկայում։ Գևորգ Պապոյանը պարզաբանել է, որ համաֆինանսավորվող սուբվենցիաներով կկառուցվեն ճանապարհներ ու ջրագծեր, բայց համայնքները կարող են նաև այնպիսի ծրագրեր իրականացնել, որոնց համար անհրաժեշտ չէ սուբվենցիոն օժանդակություն։

Համայնքային զարգացման համաձայնագրով ավելի քան 100 մլն դոլար կտրամադրվի Ամուլսարի ազդակիր համայնքներին։ Այդ փաստաթղթով են կարգավորվելու հարաբերությունները Էկոնոմիկայի նախարարության, «Լիդիան Արմենիա» ընկերության և ազդակիր համայնքների՝ Ջերմուկի, Սիսիանի և Վայքի միջև։ Պարզաբանում է էկոնոմիկայի նախարար Գևորգ Պապոյանը․

«Փաստացիորեն սեպտեմբեր–հոկտեմբերին տարեկան 7 մլն դոլար է «Լիդիան Արմենիա»–ն տալու, իսկ արդեն սեպտեմբերից  այդ գումարը կդառնա 9 մլն դոլար, քանի որ հանքը սեպտեմբերից կաշխատի։ Պարոն Ալոյանը մեզ խոստացել է, որ ոսկու առաջին ձուլակտորը  սեպտեմբերին մենք կունենանք, և փաստացիորեն հանքարդյունաբերությունը կմեկնարկի ամբողջ ծավալով»։

Տարեկան ներդրման 70 %-ը բաշխվելու է Ջերմուկ, Վայք և Սիսիան խոշորացված համայնքների միջև։ Բանաձևը հիմնվում է մի շարք գործոնների վրա՝ ներառյալ  ազդակիր Ջերմուկ, Կեչուտ, Գնդեվազ, Սարավան և Գորայք բնակավայրերի բնակչության թիվը, Ամուլսարի ծրագրի համար օգտագործվող հողատարածքների մակերեսը և հանքի ենթակառուցվածքներին բնակավայրերի մոտ լինելը։ Բայց գումարը տրամադրվելու է ոչ թե անմիջապես համայնքներին, այլ ընկերության ստեղծած հիմնադրամին: «Լիդիան Արմենիա» ընկերության գործադիր տնօրեն Հայկ Ալոյան․

«Սա կարևոր ներդրում է բոլոր համայնքների համար, որոնք մեզ գործընկեր են՝ Ջերմուկ, Վայք, Սիսիան։ Շատ կարևոր է, որ մինչև այսօր աշխատել ե նք համայնքների հետ, սա պարտավորություն է, որ մենք շարունակելու ենք աշխատել»։

Ամուլսարի հանքավայրի շահագործումը տարեկան 100 մլն դոլար հարկային եկամուտ կապահովի, եթե ոսկու միջազգային գինը պահպանվի ներկայիս միջակայքում, վստահեցնում է Գևորգ Պապոյանը․

«Ծրագրի էությունն այն է, որ պետությունը ոչ միայն հարկերի ու տուրքերի տեսքով է եկամուտ ստանալու, այլև պետությունը 12,5 % փայատեր է, շահույթի մի մասը պետությանն է։ Սա էլ բավարար չէ, ևս 9 մլն դոլար կտրամադրվի համայնքներին, և սուբվենցիոն ու ոչ սուբվենցիոն ծախսեր կարվեն»։

Գործադիրում վստահ են, որ առաջիկա տարիներին երեք համայնքում հազարավոր նոր աշխատատեղեր կստեղծվեն, որոնք բարձր եկամուտ կապահովեն տեղացիների համար։

armradio.am