Քաղաքացիությունը ձեռք է բերվում որպես ճամփորդական փաստաթուղթ, ասել է ՆԳ փոխնախարարը

Ռուսաստանում ապրող հայերի Հայաստանի քաղաքացիություն ստանալու դիմումների «պատմական աճ» է գրանցվել, այսօր հայտարարել է ՆԳ փոխնախարար Արմեն Ղազարյանը։ 2025 թվականին քաղաքացիության համար դիմել է 32 հազարից ավելի մարդ։ Ըստ նախարարի՝ 2023 եւ 2024 թվականներին եղել է 20 հազարից ավելի դիում, իսկ միջին թիվը կազմել է տարեկան 7- 8 հազար։

Փոխնախարարն այս միտումը կապում է ռուս- ուկրաինական պատերազմով եւ Ռուսաստանի քաղաքացիների նկատմամբ ճամփորդական սահմանափակումներով։

«Ստացվում է, որ քաղաքացիությունը գործիքայնացվում է պարզապես ճամփորդական փաստաթուղթ ձեռք բերելու համար, որովհետև, եթե նայենք, թե ազգությամբ հայերի համար քաղաքացիություն ձեռք բերելու ինչպիսի պահանջներ ունի Հայաստանի Հանրապետությունը, այդ պահանջները զրոյական են, այսինքն` որևէ պահանջ չունի»,- ասել է փոխնախարարը։

Այս առումով՝ փոխնախարարը անհրաժեշտ է համարում «քաղաքացիության ինստիտուտի արժեւորումը»։

«Այդ խոսակցությունները քաղաքացիության ինստիտուտի արժևորման մասով մենք ունեինք դեռևս այն ժամանակահատվածում, երբ դեռ չէր սկսվել վիզաների ազատականացման երկխոսությունը ԵՄ հետ։ Այսինքն` այս խնդիրը նոր չէ մեր օրակարգում, և առաջիկայում մենք նաև կներկայացնենք համապատասխան օրենսդրական փոփոխությունների նախագիծ»,- հայտարարել է Արմեն Ղազարյանը։