Մեր տնտեսությունը ադապտացիայի բավական լավ տեմպեր է ցույց տալիս, և մենք ուզում ենք դա քաջալերել. Փաշինյան

ՀՀ կառավարությունը հավանություն տվեց Հայաստանի Հանրապետության կառավարության 2023 թվականի հուլիսի 27-ի N 1284-Լ որոշման մեջ լրացում կատարելու մասին հարցին:

«Նախագծի մշակումը և ընդունումը պայմանավորված է ՀՀ-ում ջերմատնային տնտեսությունների զարգացման աջակցության ծրագրի շրջանակում ջերմատնային արտադրանք արտահանող տնտեսվարողների համար «Ռոսսելխոզնադզոր»-ի կողմից կիրառվող սահմանափակումների հետևանքները մեղմելու նպատակով լրացուցիչ արտոնություն տրամադրելու անհրաժեշտությամբ»,- նշեց էկոնոմիկայի նախարար Գևորգ Պապոյանը:

Նրա խոսքով՝ ծրագրի շրջանակում կնքվել է 20 պայմանագիր, և 91.5 հա տարածքում ջերմատնային տնտեսություններ են հիմնվել կամ հիմնվում, դրանցից 34.5 հա-ն արդեն իսկ հիմնվել է, և այս տարի արտադրանք է թողարկել:

«Նախագծով առաջարկվում է, որ այս 34.5 հա-ի համար ծրագրի շրջանակում այդ ջերմատների շահառուների համար մինչև 2026 թվականի հուլիսի 1-ն իրականացրած մոնիթորինգի արդյունքներով, եթե ջերմատունը կառուցվել է և 2026 թվականի ընթացքում գյուղատնտեսական արտադրանքն արտադրել է, վաճառել է, վարկի մարման համար սահմանված առավելագույն ժամկետը երկարաձգել և սահմանված 12 ամիս արտոնյալ ժամկետից բացի տրամադրել լրացուցիչ 6 ամիս վարկի մայր գումարի և տոկոսադրույքի արտոնյալ ժամկետի համար: Սրանք այն ջերմատներն են, որոնց համար արտոնյալ ժամկետն ավարտել է: Իրենք արդեն կառուցել են, ավարտել են, արտադրանք են թողարկում. իրենք և՛ մայր գումար են վճարում, և՛ տոկոսադրույք, որովհետև կան ջերմատնային տնտեսություններ, որոնց տոկոսադրույքն ամբողջությամբ Կառավարությունն է վճարում, կան այնպիսիները, որոնց մի փոքր հատվածը իրենք են վճարում: Մենք առաջարկում ենք, որ իրենք հաջորդ 6 ամսվա համար մայր գումար և տոկոսադրույք չեն վճարի, և այդ բեռը իրենց մասով տեղափոխվում է հաջորդ ժամանակահատված, որպեսզի բայց չծանրաբեռնվի, հաջորդ ժամանակահատվածի համար ևս 6 ամիս վերջից ենք ավելացնում: Այն, ինչ պետք է հաջորդ 6 ամսում վճարեն, կվճարեն ամենավերջում: Կառավարությունը իր պարտավորությունը բանկերի առաջ կշարունակի կատարել: Սահմանված արտոնությունից օգտվելու համար շահառուն կարող է դիմել ֆինանսական կառույցին մինչև այս տարվա սեպտեմբերի մեկը՝ դիմումին կից ներկայացնելով ՊԵԿ կողմից տրամադրված տեղեկանք 2026 թվականի իրացված գյուղատնտեսական արտադրանքի և էկոնոմիկայի նախարարության կողմից տրամադրված տեղեկանք մոնիթորինգի արդյունքներով ջերմատունը կառուցած լինելու վերաբերյալ»,- ասաց Պապոյանը:

Նրա խոսքով՝ մոնիթորինգը ցույց է տալիս, որ ընթացիկ իրավիճակում մեր տնտեսությունը ադապտացիայի բավական լավ տեմպեր է արձանագում:

«Մենք ուզում ենք այս և նմանատիպ ծրագրերում այդ ադապտացիան քաջալերել, և նաև մենք շարունակում ենք մոնիթորինգը: Հիմնական լարվածությունները, որ կարող են այս շրջանում լինել, կապված են վարկերի մարման գրաֆիկների հետ: Գործնականում Կառավարությունն ասում է հետևյալը. հարգելի տնտեսվարողներ, առաջիկա 6 ամիսների ընթացքում դուք կարող եք դրա մասին չմտահոգվել, գնացեք, հանգիստ նոր շուկաների հնարավորությունները, որ մենք ձեզ համար բացել ենք, գնացեք այդտեղ հանգիստ նոր շուկաներին հարմարվեք և սկսեք աշխատել արտահանման նոր ուղղություններով: Ես կարծում եմ՝ սա շատ լավ, փայլուն հնարավորություն է մեր տնտեսության համար: Մենք շարունակում ենք տեսնել էլ որտեղ, ինչ հասցեական աջակցություններ կարող ենք անել բոլոր այն դեպքերում, երբ որ մենք կարձանագրենք, որ մարդիկ հանդիպել են օբյեկտիվ խոչընդոտի. երբ որ ապրանքը, արտադրանքը համապատասխանում է ստանդարտին, և ստանդարտին համապատախասխանելու պայմաններում ինքն ունի որոշակի խնդիրներ: Այն ապրանքները, որոնք ստանդարտներին համապատասխանում են, մենք միանշանակ և աներկբա կանգնելու ենք տնտեսվարողների  կողքին, աջակցելու ենք նրանց, և քաջալերելու ենք, որպեսզի նրանք նույն տեմպով շարունակեն աշխատանքը»,- նշեց վարչապետ Նիկոլ Փաշինյանը:

Գևորգ Պապոյանի խոսքով՝ այն ջերմատներին, որոնց հիմա աջակցում են, փաստացի, իրենց արտադրանքը ոչ միայն ունի միջազգային սերտիֆիկատներ, այլև սա ամբողջապես նույն տեխնոլոգիաներն է, ինչը, օրինակ, Եվրոպական միության զարգացած գյուղատնտեսական երկրներում կարող են ունենալ, նույն որակավորում ունեցող մասնագետներն են, նույն տեխնոլոգիան, նույն մեթոդները, նույն սարքավորումները, բացարձակապես նույնն է:

«Մենք տրանսպորտային որոշակի հեռավորությունների խնդիր ունենք, և դրա պատճառով նաև աջակցության ծրագրեր ենք իրականացնում, որպեսզի փորձենք այդ ադապտացիան ապահովել»,- ասաց Գևորգ Պապոյանը

Վարչապետն արձագանքեց՝ նշելով, որ իր կարծիքով՝ տրանսպորտային հեռավորության խնդիր էլ չկա:

«Ընդհակառակը՝ մի շարք նոր տրանսպորտային ուղղություններ են բացվել, որոնք Ա կետից Բ կետը ավելի կարճ են հասնում, քան այն, որ մենք նախկինում ունեցել ենք: Աշխարհագրությունը նուրբ գիտություն է, տարբեր հնարավորություններ ունի, դրանք պետք է պարզապես տեսնել: Իհարկե, հընթացս կզբաղվենք նաև ԵԱՏՄ-ում ստեղծված խնդիրները կարգավորելու հարցով»,- նշեց Փաշինյանը: