Օրենքի պահանջները չկատարելը կհանգեցնի լիցենզիայի դադարեցման. ՆԳՆ-ն հիշեցնում է

2025 թվականի ապրիլի 18-ին ընդունված «Մասնավոր պահնորդական գործունեության մասին» օրենքում լրացումներ և փոփոխություններ կատարելու մասին»  օրենքով սահմանված որոշ դրույթներ ուժի մեջ են մտնում 2026 թվականի հունվարի 1-ից։ Այս մասին տեղեկանում ենք ՆԳՆ-ից: Համաձայն այդ փոփոխությունների՝ լիցենզիա ստացած մասնավոր պահնորդական գործունեություն իրականացնող կազմակերպությունները պարտավոր են իրենց լիցենզիան համապատասխանեցնել օրենքով նախատեսված նոր պահանջներին։

Օրենքով սահմանված պահանջները չկատարելու դեպքում Ներքին գործերի նախարարությունը հետամուտ կլինի պահնորդական կազմակերպությունների լիցենզիայի գործողության դադարեցմանը։

Հիշեցնենք նաև, որ ՆԳՆ ոստիկանությունը խիստ վերահսկողություն է իրականացնում արդեն իսկ գործող  պահանջի կատարման նկատմամբ, համաձայն որի՝  պաշտպանվող յուրաքանչյուր անձի տրանսպորտային միջոցով փոխադրումը կարող է իրականացվել միայն մեկ տրանսպորտային միջոցով, որի մեջ կարող է գտնվել երեքից ոչ ավելի թիկնապահ (այդ թվում` վարորդ-թիկնապահը):