Գյուղացիներից շատերը չեն կարողանում հողի հարկը վճարել. նրանց ասել են՝ դատի կտանք

«Փաստ» օրաթերթը գրում է. «Այս պահին Արմավիրի մարզի Արևադաշտ համայնքում 70 հարկատու հողի հարկը չի կարողացել վճարել: Օրեր առաջ էլ մարզխորհրդի նիստի ժամանակ մարզպետ Աշոտ Ղահրամանյանը համայնքապետերին առաջարկել է հողի հարկի պարտավորություններ ունեցող ֆիզիկական անձանց խոշոր պարտքերի բռնագանձման վերաբերյալ սեղմ ժամկետում համապատասխան հայցեր ներկայացնել դատարան:

Արևադաշտ համայնքի ղեկավար Հովսեփ Օհանյանը «Փաստ» օրաթերթի թղթակցի հետ զրույցում տեղեկացրեց, որ պարտատերերին այդ մասին տեղյակ է պահել:

«Առաջիկայում ես կաշխատեմ բոլորին տեղեկացնել և ասել՝ եթե մոտ ժամանակներս չմուծեն, դատարան են տալու: Պետք է մի բան անեն՝ վճարեն, որ չընկնեն տույժ– տուգանքների տակ»,– ասաց նա:

Օհանյանը, սակայն, վստահեցրեց՝ անպարտաճանաչ հողագործ չկա, պարտավորությունները մինչև վերջնաժամկետ կկատարեն:

«Մարդիկ վարկեր են գնում վերցնում, կբերեն հարկերը կվճարեն: Սպասում են նաև գործարանների գումարներին: Մեկը սպասում է «Նոյան»–ի գումարներին, մյուսները՝ այլ գործարանների: Շատ ընկերություններ դեռ մթերած պտուղ– բանջարեղենի գումարները չեն վճարել»,– փոխանցեց Հովսեփ Օհանյանը:

Անբարենպաստ գյուղատնտեսական տարվա պատճառով հողի մշակը եկամուտ չի կարողացել ստանալ: Այստեղ բանջարաբուծությամբ և անասնապահությամբ են զբաղվում:

«Անհաջող էր տարին: Շոգերի պատճառով բերքատվությունը նվազեց՝ պտուղը քոլին չորացել էր: Փող չկարողացանք աշխատել: Մեր աշխատանքն է, սիրով հողագործությամբ ենք զբաղվում, բայց եկամուտ չենք կարողանում ստանալ»,– ասացին հողագործները:

Պարտատերերի մեջ նաև նախորդ տարվանից հարկերը չմուծողներ կան: Վճարումները չկատարելու պատճառներ ունեն:

«Կարկուտ եղավ նախորդ տարի, եկամուտ չունեցանք, հարկերը չտվեցինք, ու գնալով պարտք կուտակվեց»,– բացատրեցին նրանք:

Արմավիրի մարզում սեփական եկամուտների հավաքագրման մակարդակն այս տարի նվազել է: 2016 թվականի նույն ժամանակահատվածի համեմատ պակասել է 0,2%–ով:

Համայնքների բյուջեների սեփական եկամուտների փաստացի մուտքերը նախատեսված 2033354,3 հազար դրամի դիմաց կազմել են 1699182,1 հազար դրամ, կատարողականը՝ 83,6%: Կան համայնքներ, որոնք 50%–ից ցածր ցուցանիշներ են ապահովել»:

Մանրամասները՝ թերթի այսօրվա համարում