Երևանի ավագանու հերթական ընտրությունը կկայանա սեպտեմբերի 17-ին. Քարոզարշավին լծվելու է ՔՊ ողջ կազմը

«Ժողովուրդ» թերթը գրում է. «Կառավարության երեկվա նիստում վերջնականապես հաստատվեց, որ Երևանի ավագանու հերթական ընտրությունը կկայանա սեպտեմբերի 17-ին։ Այսպիսով, հերթական ընտրությունների քարոզարշավը մեկնարկելու է օգոստոսի 23-ից։ Հայտնի է, որ այս քարոզարշավին լծվելու է ՔՊ ողջ կազմը, և խմբակցության պատգամավորներին ևս «բերման են ենթարկելու»՝ դրան մասնակցելու և իրենց թեկնածուի քարոզն անելու համար։

Այսպիսով, այս պահի դրությամբ խորհրդարանական ընդդիմադիր ուժերը դեռ չեն հայտարարել ընտրություններին մասնակցելու որոշման մասին։ «Ապրելու երկիր» կուսակցության քաղաքապետի թեկնածուն Մանե Թանդիլյանն է, «Լուսավոր Հայաստան» կուսակցության ցուցակը կգլխավորի Դավիթ Խաժակյանը։ Ընտրություններին մասնակցելու մասին հայտարարել են նաև գործարար Տիգրան Արզաքանցյանի կինը՝ Նատալյա Ռոտենբերգը, երգահան Ռուբեն Հախվերդյանը, փաստաբան Նորայր Նորիկյանը, Կենտրոն վարչական շրջանի նախկին ղեկավար, ուրբանիստ Վիկտոր Մնացականյանը։

Հավելենք, որ Երևանի ավագանու վերջին ընտրությունները տեղի են ունեցել 2018-ի սեպտեմբերի 23-ին, ավագանին իր լիազորությունները ստանձնել է 2018-ի հոկտեմբերի 10-ին. այդ լիազորությունների ժամկետը լրանում է այս տարվա հոկտեմբերի 10-ին: Օրենքի դրույթներից ելնելով՝ Երևանի ավագանու հերթական ընտրությունները նշանակվեցին սեպտեմբերի 17-ին»։

Մանրամասները՝ թերթի այսօրվա համարում։