Բրիտանացի կենդանապաշտպանները ռեստորաններին առաջարկել են սկյուռից ուտեստներ մատուցել

Բրիտանական Exmoor Squirrel Project կազմակերպությունը տեղի ռեստորանատերերին առաջարկել է գորշ սկյուռներին մատուցել ռագուի, կարկանդակների եւ խորովածի մեջ:

«Ես նախկինում կերել եմ մոխրագույն սկյուռ՝ մաշկը հանելուց հետո,եւ այն շատ հաճելի համ ունի՝ նապաստակի պես։ Իդեալական է թողնել դանդաղ կրակի վրա կաթսայի մեջ եւ ուտել շոգեխաշած վիճակում»,-ասել է նախագծի ղեկավարներից մեկը՝ Քերի Հոուզգուդը։

Կազմակերպությունը նաեւ կոչ է անում տեղացիներին դադարեցնել գորշ սկյուռներին կերակրելը, իսկ որոշ դեպքերում թակարդներ տեղադրել այգիներում կամ սիզամարգերում՝ կրծողներին բռնելու համար:

Բնապահպաններն ասում են, որ կարմիր սկյուռները, որոնք մոտ տասը հազար տարի ապրել են Մեծ Բրիտանիայում, կարող են անհետանալ մեկ տասնամյակի ընթացքում՝ ինվազիվ մոխրագույն սկյուռի պատճառով:

Մոխրագույն սկյուռները ծառերից հանում են կեղեւը՝ տակի հյութին հասնելու համար, եւ դրանով իսկ լուրջ վնաս են հասցնում անտառներին։ Նրանք նաեւ կրում են սկյուռի ջրծաղիկի վիրուս, նրանց համար վտանգավոր չէ, բայց մահացու է կարմիր սկյուռների համար։