Ադրբեջանի կողմից գազամատակարարման խափանումը ցուրտ եղանակային պայմաններում ահաբեկչություն է Արցախի խաղաղ բնակչության նկատմամբ.Ստեփանակերտի բնակիչ

Արցախի կանա՛յք,

կոչ ենք անում բոլորիդ թողնել առօրյա գործերը եւ ձեր երեխաների հետ մարտի 24-ին՝ ժամը 11:30-ին մասնակցել մանկական հիվանդանոցի մոտ կազմակերպվող խաղաղ հավաքին։ Այս մասին ֆեյսբուքի իր էջում գրել է Արցախի հանրապետության բնակիչ Արմինե Ավագիմյանը։

«Սիրելի ընկերներ,
այն, ինչ հիմա տեղի է ունենում Արցախում, կարելի է միայն հումանիտար աղետ անվանել։ Ադրբեջանի կողմից գազի մատակարարման խափանումը աննախադեպ ցուրտ եղանակային պայմաններում ոչ այլ ինչ է, քան ահաբեկչություն Արցախի խաղաղ բնակչության նկատմամբ։

Եթե ոչ մենք, հասարակ քաղաքացիներս, ապա ո՞վ մեր փոխարեն կհասցնի աշխարհին, թե ինչպես են Ադրբեջանի իշխանությունները ահաբեկում Արցախի ժողովրդին՝ էթնիկ բնաջնջման ենթարկելու նպատակով։

Այո՛, մենք պիտի պայքարենք մեր հայրենիքում ապրելու իրավունքի համար բոլոր հնարավոր միջոցներով, և այս պահին մեր ձայնը լսելի դարձնելու լավագույն միջոցը խաղաղ հավաք կազմակերպելն է։

Արցախի կանա՛յք,
կոչ ենք անում բոլորիդ թողնել առօրյա գործերը եւ ձեր երեխաների հետ մարտի 24-ին՝ ժամը 11:30-ին մասնակցել մանկական հիվանդանոցի մոտ կազմակերպվող խաղաղ հավաքին։

Ցույց տանք ամբողջ աշխարհին, որ մենք կանք եւ ուզում ենք արժանապատիվ խաղաղություն անվտանգ Հայրենիքում՝ մեր երեխաների համար»,-գրել է նա։