Ռուսաստանում պաշտոնապես շան միս են վաճառում

Ռուսաստանում, տնտեսական պատժամիջոցների կիրառումից հետո, սննդամթերքի պակասը լրացնելու ուղղությամբ եւս մեկ քայլ է արվել. այժմ լեհական տավարի մսի եւ իսպանական խամոնի պակասը, որը վերջերս արգելել էին նույնիսկ համացանցով տեսնել, կարելի է փոխհատուցել հայրենականով. հայրենական շան մսով։ Ուտելու համար պիտանի շներին բուծում են, սպանում եւ իրացնում Իրկուտսկի շրջանի Բրատսկ քաղաքում, հատուկ ֆերմայում, հաղորդում է ռուսական FlashNord-Siberia ինֆորմացիոն գործակալությունը։

Ռուսաստանցիների համար դեռ ոչ այնքան սովորական այս բիզնեսը պատկանում է գործարար Ալեկսանդր Նեչաեւին՝ Իրկուտսկից։ Նրա խոսքերով, ֆերմայում բուծում են բացառապես ասիական նուրեոնգի ցեղատեսակի շներ. դրանք հատուկ սննդի մեջ օգտագործելու համար են սերվել։ Այս շների միսը Կորեայում եւ Չինաստանում դելիկատես է համարվում, եւ բավական թանկ է։
Շան սառեցված մսի առաջին խմբաքանակը վաճառքի է հանվել հունվարի 29-ին։ Ամբողջ խմբաքանակը երկու օրվա ընթացքում գնել են դելիկատեսների սիրահարները։
Սակայն գործարարը շան մսի իրացման ընթացքում տարօրինակ խնդրի հետ է բախվել։ "ВКонтакте" սոցցանցի նրա խումբը, որի միջոցով իրականացվում էր վաճառքը, արգելափակվել է սոցցանցի ղեկավարության կողմից։ Պատճառ են հանդիսացել այդտեղ հնչող «բռնի գործողությունների կոչերը», ինչպես նաեւ կենդանիների պաշտպանների բազմաթիվ բողոքները։ Ի դեպ, այս որոշումը գործարարը պատրաստվում է բողոքարկել։
Հիշեցնենք, որ ռուսաստանցիները առաջին անգամ չէ, որ շան միս են ուտում։ Իհարկե, նրանք միշտ չէ, որ գիտեն, թե հատկապես ինչ են ուտում։ Օրինակ, 2016 թվականի ամռանը, Սամարայում, ոստիկանները սպանդագործների մի ամբողջ ցանց էին բացահայտել, որոնք որսում էին անօթեւան շներին եւ իրացնում դրանց միսը վիետնամական խոհանոցի կաֆեներում։ Միեւնույն ժամանակ, օրինակ, Չինաստանում այս մթերքը լիովին ընդունելի է, այնտեղ նույնիսկ հատուկ շան մսի ամենամյա ֆեստիվալներ են անցկացվում։ .
Շան միսը, սակայն, ՌԴ–ում, սննդամթերքի խնդրի լուծման միակ տարբերակը չէ։ Օրինակ 2015 թվականին, Տոմսկի պետական համալսարանում, որդերի աճեցման հատուկ մեթոդ էին մշակել, որոնց կարելի է օգտագործել սննդի մեջ։ Դրանց միսը, ինչպես հավաստիացնում են ռուս գիտնականները, պարունակում է անհրաժեշտ բոլոր արժեքավոր սպիտակուցներն ու ամինաթթուները։ Հետագայում այս հետազոտությամբ լրջորեն հետաքրքրվեցին սննդի արդյունաբերությամբ զբաղվող գործարարները։ Իհարկե, թե ինչ է թաքնված երշիկների, նրբերշիկների եւ պելմենիների վրա նշված՝ «բնական սպիտակուցային զանգված» արտահայտության տակ, ռուսաստանցիներին, ամենայն հավանականությամբ, չեն պարզաբանի։

Top-News.am