Դադարեցրեք կտտանքի ենթարկել հայ ֆուտբոլասերին

ՀՀ քաղաքացին, ֆուտբոլասերը ամսեկան վճարում է 15 հազար, 18 հազար դրամ՝ ակնկալելով, որ ուզածի չափով կհետեւի, օրինակ, ֆուտբոլի Անգլիայի առաջնության կամ Չեմպիոնների լիգայի հանդիպումներին:

Վճարելը վճարեց, բայց հետո կանգնեց հայաստանյան դաժան իրականության առաջ: «հ2»-ը գնեց Անգլիայի խաղերի հեռարձակման իրավունքը եւ «Յուքոմ»ից եւ մյուսներից պահանջեց չցուցադրել Անգլիայի առաջնությունը: Ստացվեց, որ այս հեռուստաընկերությունը գնել է խաղերը ոչ թե ցուցադրելու, այլ չցուցադրելու իրավունքը:

Ցուցադրում են երկու խաղ, եւ չեն ցուցադրում ութը: դեռ մի կողմ թողնենք հեռարձակման ցածր որակը եւ խոսենք հարցի բարոյական եւ իրավական կողմի մասին: Ո՞վ է փոխհատուցելու ֆուտբոլասերների քայքայված նյարդերի եւ անտեղի վճարած գումարների համար:

Հիշեցնենք, որ «Արմենիան» էլ ցուցադրում է Չեմպիոնների լիգայի խաղերը եւ Ռոստելեկոմի, «Յուքոմի» հետ ձեռք են բերել ջենտլմենական պայմանավորվածություն, եւ արգելափակում են բացառապես այն խաղերը, որը հեռարձակում է «Արմենիան»: Արդյունքում շահեցին բոլորը, այդ թվում եւ հենց «Արմենիան», որի հեղինակությունը միայն աճեց:

Հիմա հարց է առաջանում, թե ինչն է խանգարում «հ2»-ին վարվել գոնե «Արմենիայի» նման եւ մեզ չզրկեն գեղեցիկ հանդիպումները դիտելու հնարավորությունից, հատկապես, որ դրա համար մենք մեծ գումարներ ենք վճարում:

Top-News.am