Կրեմլում մեկնաբանել են իրավիճակը Լիբիայում

Ռուսաստանն օգտագործում է առկա բոլոր հնարավորությունները, որպեսզի Լիբիայում զերծ մնան գործողություններից, որոնք կարող են հանգեցնել արյունահեղության։ Այս մասին ասել է ՌԴ նախագահի մամուլի քարտուղար Դմիտրի Պեսկովը, տեղեկացնում է ՌԻԱ «Նովոստի»-ն։

«Ռուսական կողմը, անշուշտ, կօգտագործի առկա բոլոր հնարավորություններն այն բանի համար, որպեսզի կոչ անի կողմերին հրաժարվել այնպիսի գործողություններից, որոնք կարող են հանգեցնել արյունահեղ մարտերի եւ քաղաքացիական բնակչության զոհվելուն»,- ասել է Պեսկովը լրագրողներին՝ պատասխանելով այն հարցին, թե արդյոք Ռուսաստանը որեւէ կապ պահպանում է մարշալ Խալիֆա Հաֆթարի հետ, ու պատրաստ է արդյոք միջնորդ դառնալ երկրում իրավիճակի կարգավորման գործում։

2011 թվականին Մուամար Քադաֆիին տապալելուց եւ նրան սպանելուց հետո Լիբիայում սկսվել է քաղաքական ճգնաժամ։ Այժմ երկրում երկիշխանություն է տիրում։ Արեւելքում իշխում է ժողովրդի ընտրած խորհրդարանը, իսկ արեւմուտքում, մայրաքաղաք Տրիպոլում, իշխում է ՄԱԿ եւ Եվրամիության աջակցությամբ ձեւավորված Ազգային համաձայնության կառավարությունը՝ Ֆաիզ Սարաջի գլխավորությամբ։ Երկրի արեւելյան մասի իշխանությունները գործում են անկախ Տրիպոլիից եւ համագործակցում ԼԱԲ-ի հետ, որը պատերազմում է զինյալների դեմ։ ՄԱԿ-ն առաջարկում է 2019 թվականի գարնանը անցկացնել համընդհանուր ընտրություններ Լիբիայում, որոնց արդյունքներով պետք է ձեւավորվեն լեգիտիմ եւ բոլորի կողմից ընդունված իշխանության մարմիններ։

Հինգշաբթի մարշալ Խալիֆա Հաֆթարը հրամայել է իր ուժերին սկսել հարձակում Տրիպոլիի դեմ՝ «ահաբեկիչներից ազատագրելու» համար։ Հաֆթարի բանակի ստորաբաժանումները վերահսկողություն են սահմանել Գարյան եւ Սուրման քաղաքների վրա, որոնք մայրաքաղաքից հարավ են գտնվում։ Ազգային համաձայնության կառավարությանը յոլալ զինված ուժերն ապրիլի 7-ին հայտարարել են, որ սկսում են «Ցասման հրաբուխ» ռազմական գործողությունն ընդդեմ Հաֆթարի Լիբիայի ազգային բանակի։