Համացանցի օգտատերերը ծաղրել են արյան անալիզ հանձնող Պյոտր Պորոշենկոյին և Վլադիմիր Զելենսկիին

Համացանցի օգտատերերը ծաղրել են արյան անալիզ հանձնող Ուկրաինայի նախագահի թեկնածուներ Պյոտր Պորոշենկոյին և Վլադիմիր Զելենսկիին, գրում է ՌԻԱ Նովոստի գործակալությունը։

Հիշեցնենք, որ նախօրեին Ուկրաինայի գործող նախագահ Պյոտր Պորոշենկոն և նախագահական ընտրությունների 2-րդ փուլ անցած Վլադիմիր Զելենսկին իրենց հեռուստաբանավեճից առաջ արյան մեջ ալկոհոլի և թմրանյութի պարունակությունը ստուգելու անալիզ են հանձնել: Բուժզննումը մրցակիցների հանդիպման պայմաններից մեկն է եղել, ինչն էլ ծաղրի առարկա է դարձել համացանցում։

«Ո՞վ կարող է ինձ բացատրել, բանավեճից առաջ ինչի՞ համար է պետք արյուն հանձնել»,- գրել է օգտատեր Նատալի Չեկունովան։

«Պետք է հոգեբույժի էլ դիմեին»,- գրել է Ելենա Կուզմինան։

Օգտատերերից մեկն էլ գրել է, որ լիովին երջանկության համար պետք է Յուլյա Տիմոշենկոյին հրավիրեին, որպեսզի նա անալիզը վերցներ։

«Հավանաբար, կհաղթի նա, ում մոտ էրիտրոցիտների մակարդակն ամենաբարձրն է»,-գրել է Syava Razkevich-ը։

Ավելի վաղ Զելենսկին հայտարարել էր, որ հեռուստաբանավեճին կմասնակցի, եթե այն անցկացվի «Օլիմպիյսկի» մարզադաշտում: Բացի այդ նա պահանջել էր, որ ինքն ու Պորոշենկոն բանավեճից առաջ անալիզներ հանձնեն:

Պորոշենկոն ընդունել էր մրցակցի առաջարկը:

Հիշեցնենք, որ Ուկրաինայում նախագահական ընտրությունները կայացել են մարտի 31-ին: Երեսունինը թեկնածուից որևէ մեկին չի հաջողվել անհրաժեշտ քանակությամբ ձայներ հավաքել, ինչի արդյունքում նշանակվել է 2-րդ փուլ: