Թերեզա Մեյը նամակով դիմել է Տուսկին ու խնդրել «Բրեքզիթ»-ի վերջնաժամկետը երկարաձգել մինչև հունիսի 30-ը

Մեծ Բրիտանիայի վարչապետ Թերեզա Մեյն ապրիլի 5-ին նամակով դիմել է Եվրոպական խորհրդի նախագահ Դոնալդ Տուսկին՝ խնդրելով մինչև հունիսի 30-ը երկարաձգել «Բրեքզիթ»-ի (Միացյալ Թագավորության դուրս գալը ԵՄ կազմից) վերջնաժամկետն ու բրիտանացի օրենսդիրներին թույլ տալ համաձայնության գալ «Բրեքզիթ»-ի համաձայնագրի վավերացման հարցում, հայտնում է Reuters-ը:

«Միացյալ Թագավորությունն առաջարկում է վերջնաժամկետը երկարաձգել մինչև 2019թ. հունիսի 30-ը»,-իր նամակում գրել է Մեյը:

The Guardian-ի փոխանցմամբ՝ վարչապետը մանրամասնել է, որ եթե համաձայնագիրը հաստատվի մինչ այդ ժամկետը, ապա Մեծ Բրիտանիայի խնդրած ժամկետի երկարաձգումը կավարտվի ավելի շուտ:

Մեյն ընդգծել է, որ Լոնդոնն ամեն ինչ անում է ժամկետում տեղավորվելու և «Բրեքզիթ»-ի գործարքը նախքան ԵՄ խորհրդարանական ընտրությունների անցկացումն ավարտելը:

«Սակայն միևնույն ժամանակ մենք կշարունակենք նախապատրաստվել ընտրություններին, որպեսզի համաձայնագիրը ճիշտ ժամանակին չվավերացնելու դեպքում, մասնակցենք ընտրություններին»,-գրել է Մեյը:

Ավելի վաղ The Guardian-ը հայտնել էր, որ Տուսկը պատրաստվում է դիմել ԵՄ անդամ 27 պետություններին՝ առաջարկելով Մեծ Բրիտանիային 1 տարվա «ճկուն» ժամկետ տրամադրել «Բրեքզիթ»-ի հարցը վերջնականապես լուծելու համար:

Հիշեցնենք, որ Մեծ Բրիտանիայում ԵՄ-ից անկախանալու հանրաքվեն անցկացվել է 2016թ.: Սակայն առ այսօր Լոնդոնը չի վավերացրել Բրյուսելի հետ համաձայնեցված համաձայնագիրը՝ պնդելով, որ դրա որոշ դրույթներ չեն բխում Մեծ Բրիտանիայի շահերից: Ըստ նախնական ծրագրի՝ «Բրեքզիթ»-ը պետք է հաստատված լիներ 2019թ. մարտի 29-ի դրությամբ: