ՆԱՏՕ-ի անվտանգությունը կամ ռուսական С-400-ները. ԱՄՆ փոխնախագահը կոչ է արել Անկարային ընտրություն կատարել

Թուրքիան պետք է ընտրություն կատարի ՆԱՏՕ-ի անվտանգության և ռուսական С-400 զենիթահրթիռային համակարգերի միջև: Այս մասին թվիթերյան իր էջում հայտնել է ԱՄՆ փոխնախագահ Մայք Փենսը:

«Թուրքիան պետք է որոշում կայացնի. ցանկանո՞ւմ է արդյոք մնալ պատմության մեջ ամենահաջողված ռազմական դաշինքի (ՆԱՏՕ-ի – Tert.am) խիստ կարևոր գործընկերը, թե՞ ուզում է ռիսկի ենթարկել այդ գործակցության անվտանգությունը մեր դաշինքին վնասող անխոհեմ որոշումներով»,- գրել է փոխնախագահը:

Փենսը նշել է, որ Թուրքիայի կողմից ռուսական զենիթահրթիռային համակարգերի ձեռքբերումը «մեծ վտանգ» է ներկայացնում Հյուսիսատլանտյան դաշինքի համար:

Ավելի վաղ Պենտագոնից հայտնել էին, որ ԱՄՆ-ն հույսը չի կորցրել, որ կկարողանա Թուրքիային համոզել ռուսական համակարգերի փոխարեն ամերիկյան Patriot համակարգերը գնել: