Ղազախստանի նոր նախագահը Ռուսաստանի հետ «Մեծ Եվրասիա» ստեղծելու ցանկություն է հայտնել

Ղազախստանը կցանկանար Ռուսաստանի Դաշնության հետ նոր աշխարհաքաղաքական կառույց՝ Մեծ Եվրասիա ստեղծել: Այս մասին «Российская газета» թերթի հետ զրույցում հայտնել է Ղազախստանի Հանրապետության նոր նախագահ Քասիմ Ժոմարտ Տոկաևը:

Տոկաևի խոսքով՝ Ղազախստանը Մոսկվայի և Արևմուտքի միջև հարաբերությունների կարգավորման հույս ունի, քանի որ դա օգուտ կբերի ոչ միայն Եվրասիական տնտեսական միության (ԵԱՏՄ) անդամ երկրներին, այլև առհասարակ ամբողջ Եվրասիային:

«Մենք կարծում ենք, որ Մեծ Եվրասիայի գաղափարը հորիզոններ է բացում Ասիայի և Եվրոպայի միջև տնտեսական կապերի ակտիվացման համար, այն կարող է եվրասիական տարածքում միջազգային հարաբերությունների նոր համակարգի ստեղծման հիմք դառնալ»,- պարզաբանել է նախագահը:

Երկրի ղեկավարի խոսքով՝ ընդհանուր բացասական մթնոլորտի ֆոնին Ռուսաստանի և Ղազախստանի փոխազդեցությունը «միջպետական հարաբերությունների չափանիշ» է:

«Մեր առաջին նախագահ և ազգային առաջնորդ Նուրսուլթան Նազարբաևն ասում էր, որ Աստված է Ղազախստանին ու Ռուսաստանին հարևաններ ստեղծել, մենք միշտ միասին կլինենք»,- հավելել է Տոկաևը:

Հիշեցնենք, որ Տոկաևը Մոսկվա էր ժամանել ապրիլի 3-ին: Այցի շրջանակում նա հայտնել էր ՌԴ նախագահ Վլադիմիր Պուտինին, որ իր նպատակն է շարունակել իր նախորդի՝ Նազարբաևի ուղին՝ երկու երկրների միջև սերտ հարաբերություններ պահպանելով:

Քասիմ Ժոմարտ Տոկաևը ստանձնել է երկրի նախագահ պաշտոնը մարտի 20-ին՝ նախկին նախագահ Նուրսուլթան Նազարբաևի հրաժարականի հաջորդ օրը: