Ամենաազդեցիկ օրենքով գող Տարիել Օնիանին ժամկետից շուտ ազատ կարձակվի

Ամենաազդեցիկ օրենքով գող Տարիել Օնիանին՝ Տարոն, արդեն հաջորդ շաբաթ ազատ կարձակվի. նրա պատժաժամկետը կարճացվել է, տեղեկացնում է Ռոսբալթը։

Պատիժների կրման դաշնային ծառայությունը փորձել է անմիջապես նրա հանդեպ 3-ամյա վարչական հսկողություն սահմանել։ Բայց դատարանը մերժել է, քանի որ Օնիանին վտարվելու է Ռուսաստանից։ «Նրա ազատ արձակումից հետո կսրվի պայքարը «թիվ 1 օրենքով գողի» տեղի համար»,- նշում է գործակալությունը։

2010 թվականի հուլիսին Մոսկվայի Խամովնիչիի դատարանը Տարիել Օնիանիին մեղավոր է ճանաչել մարդու առեւանգման եւ դրամաշորթության մեջ, նա 10 տարվա ազատազրկում է ստացել։ Քննության ժամանակ կալանքի մեջ անցկացրած ժամանակի հաշվառմամբ Տարոն պետք է ազատ արձակվեր 2019 թվականի հունիսի 11-ին։ Բայց պարզվել է, որ դեռեւս 2017-ին օրենքով գողին հաջողվել էր դատարանի միջոցով հասնել պատժաժամկետի կրճատման մինչեւ 9 տարի 10 ամիս։ Նրա ազատման նոր օրը նշվում է 2019 թվականի ապրիլի 9-ը։ Այսինքն՝ արդեն մեկ շաբաթ հետո ամենաազդեցիկ օրենքով գողը դուրս կգա կալանավայրից։