Արսեն Ավակովը նախագահի թեկնածու Վլադիմիր Զելենսկիին անվանել է պարկեշտ մարդ՝ «այլ աշխարհից»

Ուկրաինայի ներքին գործերի նախարար Արսեն Ավակովն Ուկրաինայի նախագահի թեկնածու, շոումեն Վլադիմիր Զելենսկիին անվանել է պարկեշտ մարդ՝ «այլ աշխարհից», տեղեկացնում է ria.ru-ն:

Նախագահական ընտրություններն Ուկրաինայում անցկացվել են մարտի 31-ին: ԿԸՀ տվյալների համաձայն՝ թեկնածուներից ոչ ոք չի հավաքել առաջին փուլում հաղթանակի համար բավարար քվեներ, ուստի երկրորդ փուլը կանցկացվի ապրիլի 21-ին: Գործող նախագահ Պյոտր Պորոշենկոյին սատարում է քաղաքացիների 16,19 տոկոսը, «Բատկիվշչինա» կուսակցության ղեկավար Յուլյա Տիմոշենկոյին՝ 13,15 տոկոսը: Շոումեն Վլադիմիր Զելենսկին առաջին փուլի արդյունքներով առաջատարն է՝ 30,45 տոկոս:

«Պարկեշտ մարդ՝ այլ աշխարհից, այլ հարթությունից, որը պատրաստ է գլուխ հանել խնդիրներից, բայց միաժամանակ նաև ընդունում է, որ բազմաթիվ հարցերում այնքան էլ իրազեկված չէ: Իմ հասկանալով՝ դա նշանակում է, որ նա պատրաստ է պատվիրակելու պարտականությունները: Սակայն այստեղ հարց է ծագում՝ կարո՞ղ ենք արդյոք մենք՝ ուկրաինական հասարակությունը, առաջարկել էլիտայի այն որակը, որին կարելի կլինի հանձնարարել նման լիազորությունների իրականացումը: Չէ՞ որ եթե նա դրանք պատվիրակում է սրիկաների, ինչպես դա տեղի է ունենում «Ժողովրդի ծառա»-ի որոշ սերիաներում, դա շատ վատ կլինի երկրի համար»,-«Левый берег»-ին տված հարցազրույցում ասել է Ավակովը:

Նա նաև տեղեկացրել է, որ քաղաքական գործընթացների վերաբերյալ Զելենսկիի տեսակետները փոքր-ինչ իդեալականացված են:

«Նա հստակ գիտի, որ Ա կետից պետք է անցնել Բ կետ, և ես դա պատրաստ եմ ընդունել: Բայց խնդիրն այն է, թե ինչպես է պետք անցնել այդ ուղին: Հաճախ ճակատ ճակատի տալով կարելի է բախվել պատին և ջախջախվել, այդ իսկ պատճառով հարկավոր է ընտրել ճիշտ հետագիծ, և այստեղ պիտի աշխատեն իրավասու և ազնիվ մասնագետներ»,-հավելել է նա:

Նախարարը նաև կարծում է, որ Զելենսկիի օգտին քվեարկել են «ռուսալեզու հայրենասերները»:

«Զելենսկիի օգտին քվեարկել է ընտրազանգվածի այն մասը, որին ես անվանում եմ ռուսալեզու հայրենասերներ: Նրանք իրենց համար փնտրում էին թեկնածու, որը կհամապատասխաներ հենց իրենց չափանիշներին, և նրանք գտան նրան: Դա է պատճառներից մեկը, որ Զելենսկին ունի վստահության այդքան բարձր մակարդակ»,-կարծում է Ավակովը: