Brexit-ի հարցով ԵՄ-ի արտահերթ գագաթնաժողովը տեղի կունենա ապրիլի 10-ին

ԵՄ-ից Մեծ Բրիտանիայի դուրս գալու շուրջ ստեղծված իրավիճակի հարցով ԵՄ-ի արտահերթ գագաթնաժողովը տեղի կունենա ապրիլի 10-ին: Այդ մասին ուրբաթ թվիթերյան գրառում է կատարել Եվրախորհրդի նախագահ Դոնալդ Տուսկը՝ մեկնաբանելով բրիտանական խորհրդարանում համաձայնագրի հերթական ձախողումը, հաղորդում է ՏԱՍՍ-ը:

«Դուրս գալու վերաբերյալ համաձայնագրի դեմ Համայնքների պալատի քվեարկության արդյունքում ես որոշում եմ կայացրել հրավիրել Brexit-ի հարցով ԵՄ գագաթնաժողով ապրիլի 10-ին»,-հայտարարել է Տուսկը:

Ուրբաթ բրիտանական խորհրդարանի Համայնքների պալատը երրորդ անգամ մերժել է ԵՄ կազմից Մեծ Բրիտանիայի դուրս գալու պայմանների մասին Եվրամիության հետ համաձայնագրի նախագիծը: Կառավարության օրենսդիր մարմնին վարչապետ Թերեզա Մեյի ներկայացրած գործարքի դեմ է քվեարկել 344 պատգամավոր, իսկ կողմ՝ 286 պատգամավոր:

Գործարքի ընդունումը կնշանակեր, որ պատգամավորները մինչեւ մայիսի 22-ը կկարողանային համաձայնեցնել ԵՄ-ից «բաժանվելու» հետ կապված բոլոր հարցերը, իսկ Մեծ Բրիտանիան կլքեր եվրոպական հանրությունը նախապես համաձայնեցված ընթացակարգով շուրջ երկու ամսվա ընթացքում: Քվեարկության ներկայիս արդյունքը մեծացնում է առանց որեւէ գործարքի «կոշտ» Brexit-ի հավանականությունը:

Ավելի վաղ Եվրամիությունը նախազգուշացրել էր, որ եթե բրիտանացի պատգամավորները չքվեարկեն գործարքի օգտին այս շաբաթ, ապա երկիրը դուրս կգա ԵՄ-ից ապրիլի 12-ին: Եւս մեկ հնարավորություն է Մեծ Բրիտանիայի մասնակցությունը մայիսին կայանալիք Եվրոպական խորհրդարանի ընտրություններին, որի արդյունքում բանակությունները կհետաձգվեն մինչեւ ընթացիկ տարվա վերջ կամ ավելի ուշ: