Լավրովը Թրամփի՝ Գոլանի բարձունքի վերաբերյալ որոշումը «ամենաթողության դրսևորում» է անվանել

Ռուսաստանի Դաշնության արտգործնախարար Սերգեյ Լավրովը կարծում է, որ ԱՄՆ նախագահ Դոնալդ Թրամփի՝ Գոլանի բարձունքի նկատմամբ Իսրայելի իշխանությունը ճանաչելու որոշումը Վաշինգտոնի կողմից ամենաթողության գիտակցված դրսևորում է, գրում է РИА Новости-ն:

«Ես զգում եմ, որ դա ամենաթողության գիտակցված դրսևորում է: Եվ հենց ամենաթողությունը այդպիսի դրսևորումն է սպառնալիքների, վերջնագրերի և պատժամիջոցների, մի խոսքով՝ այդ ամենի հետ միասին ձևավորում այն գործիքակազմը, որը Միացյալ Նահանգներն օգտագործում է արտաքին հարաբերությունների ասպարեզում»,- ասել է արտգործնախարարը Թուրքիայի արտգործնախարար Մևլութ Չավուշօղլուի հետ համատեղ մամուլի ասուլիսի ժամանակ:

Լավրովը նշել է, որ միջազգային իրավունքի նկատմամբ ԱՄՆ-ի նման վերաբերմունքը նկատվում է ամենուր, մասնավորապես՝ իրանական միջուկային ծրագրի վերաբերյալ գործողությունների համատեղ համապարփակ ծրագրից երկրի դուրս գալու և Վենեսուելայում տիրող իրավիճակի օրինակներում:

Հիշեցնենք, որ անցած շաբաթ Միացյալ Նահանգների նախագահը Վաշինգտոնում Իսրայելի վարչապետ Բենյամին Նեթանյահուի հետ հանդիպման ժամանակ Գոլանի բարձունքը Իսրայելի մաս ճանաչելու մասին հռչակագիր էր ստորագրել:

Խոսքը նախկինում Սիրիային պատկանած և 1967թ.-ին Վեցօրյա պատերազմի ժամանակ իսրայելցի զինվորականների կողմից օկուպացված տարածքի մասին է: