Իսրայելում խարդախները 8 մլն եվրո են շորթել՝ ներկայանալով որպես Ֆրանսիայի ԱԳ նախարար

Իսրայելի ոստիկանությունը կալանավորել է 3 ենթադրյալ խարդախների, որոնք մի բիզնեսմենից 8 մլն եվրո են շորթել, ում ներկայացել են որպես Ֆրանսիայի ԱԳ նախարար Ժան-Իվ Լե դրիան եւ նրա օգնականներ, հայտնում է Parisien պարբերականը:

Հաղորդվում է, որ կասկածյալները ձերբակալվել են փետվարի վերջին իսրայելական եւ ֆրանսիական իրավապահ մարմինների համատեղ գործողության արդյունքում:

Խումբը գործել է Ֆրանսիայում՝ սկսած 2018 թվականի սեպտեմբերից, կիրառելով նույն մեթոդը: «Նրանք զանգահարել են, ուղարկել էլեկտրոնային նամակներ եւ երբեմն էլ օգտվել են Skype-ի չաթից, որ ներկայանան որպես նախարար»,- հայտնել է քննությանը տեղյակ աղբյուրը: Հասցեատերերին ընտրել են CAC 40 ցուցակի (ներառում է Ֆրանսիայի 40 խոշոր ընկերություն) գործարար վերնախավի ներկայացուցիչների շարքերից, որոնց խարդախները խնդրել են «երկրին օգնել» եւ վճարել պատանդների փրկագինը, որոնք իբր Մալիում կամ Սիրիայում եղել են իսլամիստների ձեռքում:

Խարդախները կատարել են մոտ 40 փորձ, բայց հաջող է եղել միայն մեկը. գործարարը, ում անունը չի հրապարակվում, նրանց հաշվին է փոխանցել 8 մլն եվրո եւ միայն հետո հասկացել, որ խաբվել է:

Առանձնապես խոշոր չափերով ֆինանսական խախտումների դեմ պայքարի բաժնի քննիչներին հաջողվել է խարդախների հետքին հայտնվել, երբ նրանք «մշակում» էին հերթական դոնորին: Եռյակը ձերբակալվել է փետրվարի 26-ին իսրայելական հանգստավայրային Նեթանիայում՝ այն պահին, երբ դեռեւս նրանց ձեռքին էին հեռախոսները, որոնցով խոսում էին իրենց զոհի հետ: