Ֆրանսիան նախազգուշացնում է Մերձավոր Արեւելքի հարցում միակողմանի մոտեցման վտանգի մասին

Պաղեստինա-իսրայելական հակամարտության լուծման հարցում երկու պետությունների սկզբունքը եւ միջազգային մակարդակում մյուս համաձայնեցված չափանիշները շրջանցելու ցանկացած փորձ «դատապարտված է ձախողման»։ Այս մասին ասել է ՄԱԿ-ում Ֆրանսիայի դեսպան Ֆրանսուա Դելաթրեն հակամարտության լուծման մասին ԱՄՆ պլանի ակնկալվող հրապարակման նախօրեին, տեղեկացնում է AP-ը։

Նրա խոսքով՝ Օսլոյի խաղաղության գործընթացի ստորագրումից 25 տարի անց «կարող է համաձայնեցված շրջանակներից շեղվելու գայթակղություն առաջանալ»։ Նա նախազգուշացրել է, որ միակողմանի ճանապարհը «չի կարող խաղաղություն բերել տարածաշրջանում» եւ «լարվածություն կհրահրի մինչեւ անընդունելի մակարդակի»։

Նրա մեկնաբանությունները ՄԱԿ ԱԽ նիստում արտացոլել են միջազգային հանրության աճող մտահոգությունը ԱՄՆ պլանի առումով, որի հրապարակումն ակնկալվում է ապրիլի 9-ին իսրայելական ընտրություններից հետո։

Ավելի վաղ ելույթ ունենալով ԱՄՆ Կոնգրեսում՝ պետքարտուղար Մայք Պոմպեոն ասել էր, որ ԱՄՆ խաղաղ պլանը Մերձավոր Արեւելքի վերաբերյալ կտարբերվի նախկին պայմանավորվածություններից այնպիսի հարցերում, ինչպիսին են Երուսաղեմի կարգավիճակն ու իսրայելական բնակավայրերը։ Հարցին, թե կողմնակից է արդյոք Թրամփի վարչակազմը ԱՄՆ բազմամյա դիրքորոշմանը երկու պետությունների սկզբունքով հարցի լուծման վերաբերյալ, Պոմպեոն ասել է, որ Միացյալ Նահանգները ցանկանում է «ընդլայնել բանակռիվները»։ ԱՄՆ պլանը «հիմնված կլինի փաստերի եւ իրատեսական գնահատականի վրա, թե ինչը մեզ լավ արդյունք կտա»,- նշել է նա։