Պենտագոնը հայտարարել է որսիչ հրթիռների առաջին հաջող արձակման մասին

ԱՄՆ հակահրթիռային պաշտպանության գործակալությունը, որը մտնում է պաշտպանության նախարարության կազմի մեջ, երկուշաբթի հայտարարել է հակահրթիռային պաշտպանության համակարգի հաջող փորձարկման մասին, որի ընթացքում առաջին անգամ իրականացվել է հակահրթիռների արձակում, որոնք նախատեսված են միջմայրցամաքային բալիստիկ հրթիռներ որսալոււ համար։ Համապատասխան հայտարարությունը տարածել է գերատեսչության մամուլի ծառայությունը, տեղեկացնում է ՏԱՍՍ-ը։

«ԱՄՆ հակահրթիռային պաշտպանության գործակալությունն այսօր իրականացրել է միջմայրցամաքային բալիստիկ հրթիռների որսման հաջող փորձարկումներ։ Փորձարկումը ցամաքային բազավորման երկու հակահրթիռների առաջին արձակումն էր սպառնալիք ներկայացնող ՄԲՀ-ների որսման համար»,- ասվում է տեղեկությունում։ Պենտագոնի տվյալներով՝ երկու հրթիռներից առաջինը «խոցել է գլխամասը, ինչպես եւ նախատեսված էր», իսկ երկրորդը «ուսումնասիրել է մնացորդները եւ այլ օբյեկտներ օդում եւ, այլ գլխամասեր գտնելով, ընտրել է սպառնալիք ներկայացնելու տեսակետից հաջորդ օբյեկտն ու խոցել այն, հենց այնպես, ինչպես ծրագրված էր»,- նշում է մամուլի ծառայությունը։

ՄԲՀ-ն, որը ոչնչացվել է փորձարկումների ընթացքում, արձակվել էր Խաղաղ օվկիանոսի Մարշալյան կղզիներից՝ հրթիռների տեղակայման վայրից 4 հազար մղոն հեռավորությունից (մոտ 6,5 հազար կիլոմետր)։ Դրանց արձակումն իրականացվել է ԱՄՆ ՌՕՈւ Կալիֆոռնիայի նահանգի Վանդենբերգի ռազմակայանից։

«Առաջին գնահատականի համաձայն՝ փորձարկման ընթացքում կատարվել են անհրաժեշտ պահանջները»,- նշում են գերատեսչությունում՝ ընդգծելով, որ մասնագետները կշարունակեն ուսումնասիրել տեղեկատվությունը։ «Համակարգը աշխատեց այնպես, ինչպես մտահղացվել էր, եւ այդ փորձարկումների արդյունքները վկայում են համազարկային արձակման դոկտրինի կիրառման հնարավորության մասին հակահրթիռային պաշտպանության համակարգում»,- ընդգծել է ԱՄՆ հակահրթիռային պաշտպանության գործակալության տնօրեն Սեմյուել Գրիվզը։