Ֆրանսիացի արքեպիսկոպոսը դատապարտվել է վեց ամսվա ազատազրկման եկեղեցում մանկապղծությունը թաքցնելու պատճառով

Լիոնի ուղղիչ դատարանը երկրի ազդեցիկ կարդինալներից մեկին՝ արքեպիսկոպոս Ֆիլիպ Բարբարենին դատապարտել է վեց ամսվա պայմանական ազատազրկման՝ եկեղեցում մանկապղծության փաստերը թաքցնելու եւ չմիջամտելու համար, տեղեկացնում է ՏԱՍՍ-ը՝ հղում կատարելով Le Dauphiné libéré-ին։

Պարբերականի տեղեկատվությամբ՝ Բարբարենը ներկա չի եղել դատարանի դահլիճում դատավճիռը հնչեցնելիս։

Դատավարությունը 1970-80-ական թվականներին եկեղեցում մանկապղծության փաստերը թաքցնելու վերաբերյալ սկսվել է հունվարի 7-ին։ Արքեպիսկոպոսից բացի ամբաստանյալների նստարանին է եղել եւս հինգ մարդ, այդ թվում՝ երկու եպիսկոպոս եւ Հռոմի կուրիայի ներկայացուցիչը։ Դատավարությունն սկսվել է La Parole Libre («Ազատ խոսք») հասարակական կազմակերպության նախաձեռնությամբ, որը հանդես է գալիս ի պաշտպանություն հոգեւորական Բեռնար Փրեինի՝ Սեն Ֆուա լը Լիոն կոմունայի սկաուտների խմբակի նախկին կապելանի կողմից ոտնձգությունների ենթարկված 60 զոհի։ Մեղադրանքների բովանդակությունն այն է, որ ոչ Բարբարենը, ոչ մյուս հոգեւորականները չեն դատապարտել նրա գործողությունները եւ միջոցներ չեն ձեռնարկել նրան դատական հետապնդման ենթարկելու համար։