Պետքարտուղարությունը Ս-400-ի գնման դեպքում Թուրքիային սպառնացել է զենքի մատակարարումների մերժմամբ

ԱՄՆ Պետքարտուղարությունը դարձյալ հայտարարել է, որ Թուրքիայի կողմից ռուսական զենիթահրթիռային Ս-400 համալիրների գնումը կարող է հանգեցնել նրան առաջավոր տեխնոլոգիաների տրամադրման մերժմանը, ամերիկյան 5-րդ սերնդի F-35 կործանիչների ստեղծմանը նրա մասնակցության կասեցմանը եւ պատժամիջոցների, փոխանցում է «ՌԻԱ Նովոստի»-ն:

Պարբերական ճեպազրույցի ժամանակ ԱՄՆ Պետքարտուղարության մամուլի ծառայության ղեկավարի տեղակալ Ռոբերտ Պալադինոն հստակեցրել է, որ պատժամիջոցները կարող են սահմանվել ԱՄՆ «Ամերիկայի հակառակորդներին պատժամիջոցների միջոցով հակազդելու մասին» օրենքի (CAATSA) համաձայն:

Ս-400 ԶՀԿ-ների մատակարարման համաձայնագիրը Թուրքիան Մոսկվայի հետ ստորագրել է 2017 թվականի դեկտեմբերին: Ս-400-ի գնումը դարձել է Անկարայի եւ Վաշինգտոնի միջեւ դիվանագիտական բանավեճերի պատճառ:

Վաշինգտոնը իր թուրք դաշնակիցներից պահանջում է ռուսական ԶՀԿ-ներից հրաժարվել ամերիկյան Patriot ԶՀԿ-ի օգտին: Թուրքիայի իշխանություններն այս հարցում կոշտ դիրքորոշում են որդեգրել եւ չեն ծրագրում Ս-400-ից հրաժարվել նույնիսկ Patriot գնելու դեպքում. Անկարայի կարծիքով՝ այս թեմաները «իրար հետ կապ չունեն»: