Իտալիայում ձերբակալել են մաֆիայի՝ 14 տարուց ի վեր փնտրվող պարագլխին

Իտալիայի հարավային Նեապոլ քաղաքի ոստիկանությունը ձերբակալել է Camorra հանցավոր կազմակերպության պարագլուխ Մարկո դի Լաուրոյին, որը 2004թ.-ի վերջին ընդհատակ էր անցել, գրում է La Repubblica-ն:

Հանցագործը ձերբակալվել է մարտի 2-ին՝ ոստիկանների և կարաբիներների համատեղ գործողության արդյունքում: Դի Լաուրոյի մոտ զենք չի եղել, և ձերբակալության ժամանակ նա դիմադրություն չի ցուցաբերել:

Երեսունութամյա մաֆիոզին 2005թ.-ին երկրում ամենափնտրված հանցագործների ցուցակում երկրորդն է եղել՝ Cosa Nostra կազմակերպության պարագլխից հետո:

2015թ.-ին Նեապոլի վերաքննիչ դատարանը դի Լաուրոյին ցմահ ազատազրկման է դատապարտել Անտիլլիո Ռոմանոյի սպանության համար, որին դի Լաուրոն սխալմամբ սպանել էր 2005թ.-ին: Նրան մեղադրում են նաև թմրաբիզնեսով զբաղվելու համար:

Հաղորդվում է, որ մի քանի տարի առաջ դի Լաուրոն վիրահատության միջոցով փոխել է արտաքինը, ինչպես նաև իրավապահ մարմիններից թաքնվելու նպատակով հաճախ կանացի հագուստով է շրջել: