Պակիստանը ժամանակավորապես դադարեցրել է Հնդկաստան գնացքների երթեւեկությունը

Պակիստանի իշխանությունները անորոշ ժամկետով դադարեցրել են շաբաթական 2 անգամ Պակիստանի եւ Հնդկաստանի միջեւ երթեւեկող Samjhota Express գնացքի երթեւեկությունը՝ 2 երկրների հարաբերություններում լարվածության աճի պատճառով: Այս մասին հայտնել է Doon պարբերականը՝ վկայակոչելով Պակիստանին ԱԳՆ-ին:

Պակիստանի ԱԳՆ հայտարարության մեջ նշված է, որ «Լահորի [պակիստանյան քաղաք] եւ Աթարիի [հնդկական քաղաք] միջեւ երկուշաբթի եւ հինգշաբթի օրերին երթեւեկող գնացքը երթեւեկությունը կվերականգնի անմիջապես այն բանից հետո, երբ անվտանգության հետ կապված իրավիճակը բարելավվի»: Ավելի վաղ Իսլամաբադում խոստացել էին, որ գնացքի ժամանակացույցում փոփոխություններ չեն լինի:

Քաշմիրի հնդկական եւ պակիստանյան գոտիները բաժանող վերահսկման գծում լարվածությունը շարունակում է պահպանվել փետրվարի 14-ին հնդկական Ջամու եւ Քաշմիր նահանգում հնդիկ զինվորականների ավտոշարասյան դեմ ահաբեկչական հարձակումից հետո: