ՄԱԿ-ը Հս. Կորեային միջուկային ծրագիրը զարգացնելու փոխարեն խորհուրդ է տվել կերակրել բնակչությանը

ՄԱԿ-ում Գերմանիայի մշտական ներկայացուցիչ Քրիստոֆ Հոյսգենը պատմել է կազմակերպության Անվտանգության խորհրդում Հյուսիսային Կորեայի նկատմամբ պատժամիջոցների մեղմացման հարցով քննարկումների մասին, գրում է РИА Новости-ն:

«Քննարկումների ընթացքում ասվեց, որ միջուկային ծրագիրը շարունակելու փոխարեն Հյուսիսային Կորեայի իշխանությունները լավ կանեն՝ միջոցներն ուղղեն սեփական բնակչությանը կերակրելուն, դա նրանց պարտք է»,- ասել է Հոյսգենը:

Նա հավելել է, որ ԿԺԴՀ-ն ջանքեր է գործադրում երկրի նկատմամբ կիրառվող պատժամիջոցները շրջանցելու համար:

Ինչպես նշում է գործակալությունը, ԱՄՆ-ն և Հյուսիսային Կորեան փորձում են համաձայնության գալ Սինգապուրի գագաթնաժողովում Կորեական թերակղզու ապամիջուկայնացման և Փհենյանի ու Վաշինգտոնի միջև հարաբերությունների կարգավորման վերաբերյալ պայմանավորվածությունների իրականացման քայլերի հաջորդականության շուրջ, սակայն մինչ այժմ հստակ քայլեր չեն արվել. Փհենյանը սպասում է Վաշինգտոնի կողմից ձեռք բերված պայմանավորվածությունների իրականացմանը, մինչդեռ ԱՄՆ վարչակազմը ԿԺԴՀ-ի կողմից միջուկային զինաթափմանն ուղղված քայլեր է ակնկալում:

Փետրվարի 27-ին երկու պետությունների ղեկավարներն այս հարցի շուրջ հանդիպում կունենան Վիտենամում:

Հիշեցնենք, որ ՄԱԿ-ի Պարենի և գյուղատնտեսության կազմակերպությունը հաշվետվություն էր ներկայացրել, ըստ որի՝ Հյուսիսային Կորեայի ամեն 4-րդ քաղաքացի պարենային անվտանգության բացակայության պատճառով ճգնաճամային իրավիճակում է, իսկ 19 միլիոն քաղաքացի կախում ունի պարենային բաշխման պետական համակարգից:

Հյուսիսային Կորեան 1990-ականների կեսից ի վեր, երբ դադարեցվեց ԽՍՀՄ-ի կողմից սուբսիդիաների մատակարարումը, բախվում է բնակչության համար պարենի մշտական անբավարարության հետ:

Տարբեր տվյալներով՝ սովի զոհ է դարձել մի քանի հարյուր հազարից մինչև մի քանի միլիոն հյուսիսկորեացի: