Գորբաչովը Վաշինգտոնին կոչ է արել երկխոսություն սկսել Մոսկվայի հետ

ԽՍՀՄ նախկին նախագահ Միխայիլ Գորբաչովը կարծում է, որ դուրս գալով «Միջին և փոքր հեռահարության հրթիռների մասին» (ՄՓՀՀ) պայմանագրից` Միացյալ Նահանգները նպատակ ունի բացարձակ ռազմական առավելություն ձեռքբերել և իր կամքը թելադրել աշխարհին: Նա նաև կոչ է արել ԱՄՆ-ի ժողովրդին և Կոնգրեսին երկխոսել Մոսկվայի հետ: Գորբաչովի հոդվածը հրապարակվել է Ведомости պարբերականի սյունակում, հաղորդում է РИА Новости-ն:

Հիշեցնենք, որ երկկողմ պայմանագիրը ստորագրվել է 1987 թվականի դեկտեմբերի 8-ին` Միխայիլ Գորբաչովի` Վաշինգտոն կատարած այցի ժամանակ: Դոնալդ Թրամփը փետրվարի 2-ին հայտարարել էր ԱՄՆ-ի` պայմանագրից դուրս գալու մասին:

«ԱՄՆ-ի այս որոշումը պայմանավորված չէ ամերիկյան ղեկավարության կողմից հնչեցվող հանգամանքերով, կան այլ պատճառներ. ԱՄՆ-ը ցանկանում է ազատվել սպառազինությունների ոլորտում ցանկացած սահմանափակումից, ձեռք բերել բացարձակ ռազմական առավելություն... ենթադրում եմ, որ իր կամքը թելադրի աշխարհին, այլապես ինչի համար»- գրել է Գորբաչովը:

Նրա խոսքով` այս որոշման արդյունքում աշխարհում կսկսվի սպառազինությունների նոր մրցավազք, քաոս և անարոշություն: ԽՍՀՄ նախկին նախագահը դիմել է ամերիկացիներին և ԱՄՆ Կոնգրեսի անդամներին` կոչ անելով հաղթահարել առկա հակասությունները և երկխոսության սեղանի շուրջ նստել Մոսկվայի հետ: Ռուսաստանը, նրա կարծիքով, պատրաստ է այդ երկխոսությանը: