Զուգարան պարտապանների համար

Ռուսաստանի Իրկուտսկ քաղաքում ջրամատակարարման ընկերությունն օրիգինալ միջոց է մտածել պարտապաններին կոմունալ վճարումները կատարելու մասին հիշեցնելու համար, հաղորդում է 5TV հեռուստաալիքը:

Ընկերությունը բնակարաններից մեկի առաջ փայտե զուգարան է տեղադրել, որի վրա փակցված է եղել «զուգարան պարտապանների համար» վերնագրով ցուցանակը: Ինչպես երևում է, ձեռնարկված միջոցը հաջողություն է ունեցել, քանի որ վերջին ամիսներին զուգարանը «շրջում» է քաղաքի՝ կոմունալ վճարումները չկատարած մարդկանց բնակարաններով:

«Զուգարանն օգտագործվում է՝ հիշեցնելու համար մարդկանց, որ կոմունալ հարմարությունները ձրի չեն, և դրանց դիմաց հարկավոր է վճարել»,- ասել է ընկերության ներկայացուցիչներից մեկը:

Օրենքի համաձայն՝ կոմունալ ծառայություններ մատուցող ընկերությունները կարող են ցանկացած պահի դադարեցնել ծառայությունների մատուցումը, եթե պարտքը գերազանցում է սահմանված չափը, սակայն Իրկուտսկում որոշել են կտրուկ միջոցների դիմելուց առաջ հոգեբանական ճնշման այս ձևը գործի դնել:

Անցած տարի Սամարայի մարզում կոմունալ ծառայություններ մատուցող մեկ այլ ընկերություն նույն նպատակով օգտագործել էր «ամոթի բուրգը»՝ երեք տոննա զանգվածով մի բուրգ, որի վրա տարբեր ցուցանակներ են եղել՝ «այստեղ պարտապան է ապրում», կամ «դուք պետք է վճարեք ջրի պարտքը» գրություններով:

Չինաստանում ընկերություններն աներես պարտատերերի հետ առնչվելու իրենց ձևն ունեն. Սիչուան նահանգի իշխանությունները կինոթատրոններում ֆիլմերի ցուցադրությունից առաջ պարտատերերի նկարներով ու անուններով կարճ հոլովակներ են ցուցադրել: