Բրազիլիայի նախագահի որդուն կասկածում են փողերի լվացման մեջ

Բրազիլիայի ֆինանսական կառույցները բացահայտել են երկրի նախագահի որդու՝ Ֆլավիու Բոլսոնարուի հաշվին առկա միջոցների կասկածելի տեղաշարժը 2017-ին:

Ինչպես հաղորդում է РИА Новости-ն, բրազիլական «Գլոբո» հեռուստաալիքը ներկայացրել է Բրազիլիայի ֆինանսական գործունեության վերահսկման հարցով խորհրդի հաշվետվությունը: Տվյալ գերատեսչությունը զբաղվում է փողերի լվացման դեմ պայքարով: Ինչպես նշվում է, խոսքը 2017-ի հունիսից հուլիս ընկած ժամանակահատվածի մասին է:

Հաշվետվության համաձայն՝ 5 օրվա ընթացքում սենատոր Ֆլավիու Բոլսոնարուի հաշվին 48 վճարում է փոխանցվել, յուրաքանչյուրը 2000 ռեալի (մոտ 500 դոլար) չափով: Այդ ընթացքում նրա հաշվին 96 000 ռեալ է եղել (24 000 դոլար):

Բրազիլական վերահսկող խորհուրդը կասկածելի է համարում հաշվին մաս-մաս արված փոխանցումները, որոնք կատարվել են Ռիո դե Ժանեյրոյի Օրենսդիր ժողովի շենքի բանկոմատներից: