ԵՄ դեսպանները համաձայնեցրել են ՌԴ-ի դեմ սահմանված անհատական պատժամիջոցները ևս կես տարով երկարաձգելու մասին

Եվրամիության 28 անդամ երկրի դեսպանները երկուշաբթի համաձայնեցրել են Ռուսաստանի նկատմամբ սահմանված պատժամիջոցների երկարաձգումը կես տարով: Այս մասին ТАСС գործակալությանը հայտնել է ԵՄ խորհրդի աղբյուրը:

Աղբյուրի հաղորդմամբ՝ մշտական ներկայացուցիչներն այսօր համաձայնեցրել են անհատական պատժամիջոցների երկարաձգումը ևս վեց ամիս ժամկետով:

Նրա խոսքով՝ սեպտեմբերի 5-ին այս որոշումը կհաստատվի ԵՄ դեսպանների պաշտոնական նիստում: Այնուհետև այն պաշտոնապես պետք է հաստատի ԵՄ խորհուրդը, որից հետո որոշումը կհրապարակվի Եվրամիության ամսագրում և ուժի մեջ կմտնի:

Ինչպես հայտնի է, ներկայում Ռուսաստանի նկատմամբ ԵՄ սահմանած պատժամիջոցների մի քանի փաթեթ է գործում՝ տնտեսական, անհատական և պատժամիջոցներ Ղրիմի հարցով: Պատժամիջոցները գործում են մինչև 2019-ի հունվարի 31-ը: Ներկա պահին սահմանափակումներ են գործում 155 ֆիզիկական անձի և 44 կազմակերպության նկատմամբ: