ՌԴ Ստերլիտամակ քաղաքում հրդեհ է առեւտրային համալիրում

Հրշեջները մարում են Ստերլիտամակի «Սոլնեչնի» առեւտրային-սպասարկման համալիրի երկրորդ հարկում բռնկված հրդեհը, հայտնում է «Ինտերֆաքսը»՝ վկայակոչելով ՌԴ ԱԻՆ մամուլի ծառայությունը։ «Նախնական տվյալներով՝ տուժել է յոթ մարդ, որոնցից երեքը զոհվել են»,- ասվում է հաղորդագրության մեջ։

Նշվում է, որ փրկարարները այրվող շենքից տարհանել են 17 մարդու։ ՌԴ ԱԻՆ-ից հայտնել են, որ նախնական տվյալներով՝ հրդեհի մակերեսը կազմում է 2,1 հազար քառակուսի մետր։

Նախարարությունից հավելել են, շենքի բարդ հատակագծով եւ կառուցվածքային առանձնահատկություններով պայմանավորված, հրդեհի մարման աշխատանքները բարդանում են։  

Հրդեհի մարմանը ներգրավվել է 47 մարդ եւ 16 միավոր տեխնիկա։

«Осторожно, новости/Զուշացեք, լուրեր են» թելեգրամյան ալիքին ականատեսները պատմել են, որ «Սոլնեչնի» առեւտրի կենտրոնում հրդեհը սկսվել է մոտավորապես ժամը 13։00-ին։

«Եթե նրանք ժամանակին ժամանեին, գուցե նման բան չլիներ։ Միայն կես ժամ անց եկան։ Բացի այդ, չկարողացան բարձրացնել իրենց փողրակները»,- պատմել է «Սոլնեչնի» առեւտրի կենտրոնում հագուստի խանութ ղեկավարող կինը։

Մյուս ականատեսները առեւտրի կենտրոնում բռնկված հրդեհը Ստերլիտամակի համար «աղետ» են անվանել, քանի որ, նրանց խոսքով, այնտեղ էր գնում «ողջ քաղաքը»։

«Սոլնեչնի»-ի առաջին հարկում վաճառվում են սննդամթերք՝ մրգեր, բանջարեղեն, ձուկ, ընկույզ, հրուշակեղեն, իսկ երկրորդ հարկում՝ հագուստ եւ կոշիկ։