Թրամփը հրամայել է բացառել կանադական ապրանքները ԱՄՆ կառավարության գնումներից

ԱՄՆ նախագահ Դոնալդ Թրամփը վարչաբյուջետային և ԱՄՆ առևտրի ներկայացուցչի վարչություններին հանձնարարել է կանադական ծագման ապրանքները հանել Միացյալ Նահանգների պետական գնումների ցանկից: Այս մասին նա գրել է Truth Social սոցցանցում։

«Կանադան տարիներ շարունակ թալանել է մեզ, բայց շատերը չգիտեն, որ Կանադայի կառավարությունը, այդ թվում՝ երկրի նահանգային կառավարությունները, արգելել են ամերիկյան փոքր ձեռնարկություններին ու ընկերություններին մասնակցել պետական գնումներին»,- ասվում է հայտարարության մեջ: Նշվում է, որ պետական գնումների ծրագիրը նախատեսում է տարեկան 50 միլիարդ դոլարի կանադական ապրանքների գնում:

Օգոստոսին Միացյալ Նահանգները 50% մաքսատուրք սահմանեց մոտ 20 միլիարդ դոլարի կանադական ապրանքների համար (տարեկան առաքումների ծավալը): ԱՄՆ գործողություններին ի պատասխան՝ Կանադայի վարչապետ Մարկ Քարնին հայտարարեց, որ Օտտավան կձեռնարկի փոխադարձ միջոցներ և մաքսատուրքեր կսահմանի սեպտեմբերի 8-ից: Դրանք կկազմեն 15%-50% և կկիրառվեն ընդհանուր 27,6 միլիարդ դոլարի արժողությամբ ապրանքների համար:

Սեպտեմբերի 7-ին Թրամփը հայտարարել է, որ կանադական Bombardier ինքնաթիռները չպետք է վաճառվեն Միացյալ Նահանգներում: Ամերիկացի առաջնորդը նշել է, որ Կանադան «ապրում է ամերիկացի գնորդների հաշվին» և իր եկամտի 50%-ը ստանում է Միացյալ Նահանգներից։