ԱՄՆ-ի ռազմական գործողությունն Իրանի դեմ կարող է ձգձգվել մինչև 2027 թվականը. WSJ

The Wall Street Journal պարբերականը, հղում անելով իր աղբյուրներին, հայտնում է, որ Պենտագոնի ղեկավար Փիթ Հեգսեթը լռելյայն երկարաձգում է ամերիկյան զորքերի տեղակայման ժամկետները Մերձավոր Արևելքում՝ չբացառելով, որ Իրանի դեմ ռազմական գործողությունն այս տարի չի ավարտվի։

Ըստ հրապարակման՝ ԱՄՆ պաշտպանության նախարարությունը երկարացնում է հակաօդային պաշտպանության ստորաբաժանումների, դեսանտայինների և ռազմական նավերի անձնակազմերի գործուղման ժամկետները տարածաշրջանում։

Որոշ ռոտացիաներ, որոնք ի սկզբանե նախատեսված էին 9 ամսվա համար, այժմ ավելացվում են մինչև մեկ տարի կամ ավելի։ Ներկայումս Մերձավոր Արևելքում տեղակայված է շուրջ 50 հազար ամերիկյան զինվորական և 19 ռազմական նավ։ Ամերիկյան ուժերը շարունակում են որսալ իրանական անօդաչու թռչող սարքերն ու հրթիռները, ուղեկցել առևտրային նավերը Հորմուզի նեղուցում, ինչպես նաև շրջափակման մեջ պահել Իրանի ափերն ու նավահանգիստները։

Միևնույն ժամանակ, ԱՄՆ նախագահ Դոնալդ Թրամփն այժմ դիտարկում է երկու հակադիր սցենար։ Մի կողմից քննարկվում է պատերազմի ավարտի մասին հայտարարելու և Թեհրանից զիջումներ կորզելու համար տնտեսական ճնշումն անցնելու տարբերակը։ Մյուս կողմից՝ ռազմական ղեկավարությունը նախագահին է ներկայացրել հետագա էսկալացիայի պլաններ, այդ թվում՝ օդային հարվածների ուժեղացում, ինչը կպահանջի ԱՄՆ ուժերի երկարատև ներկայություն տարածաշրջանում առնվազն մինչև 2027 թվականը։