Հանրությունը պետք է ստեղծի անհանդուրժողականության միջավայր կոռուպցիայի հանդեպ
Հայաստանում ԵՄ պատվիրակության ղեկավար, դեսպան Պյոտր Սվիտալսկին այսօր լրագրողների հետ զրույցում ասաց, որ դեպի ժողովրդավարություն և իրավունքի գերակայություն տանող ճանապարհը պարզ չէ, հեշտ չէ, երբեմն այն լի է խոչընդոտներով, ակոսներով, որոշ դեպքերում նաև՝ շեղումներով և հետադարձներով։ Ըստ դեսպանի՝ եվրոպական փորձն այսօր ապացուցում է, որ ժողովրդավարության և իրավունքների գերակայության նկարագիրը բավականին պարզ է, բայց այն աշխատանքը, որ արվել է դրա հետևում, նրա դիտարկմամբ՝ շատ ավելի ծավալուն է։
«Անկասկած, մենք ԵՄ-ում ցանկանում ենք համագործակցել մեր հայաստանյան գործընկերների՝ կառավարության և քաղհասարակության հետ, առաջին հերթին՝ օգնելու լուծել բոլոր այն խնդիրները, որոնք առաջանում են այդ ճանապարհին։ Չկա կատարյալ ժողովրդավարության հասնելու մեկ մոդել, չկա դատաիրավական կամ դատական իշխանության մեկ լավագույն մոդել. դա պետք է գտնի Հայաստանը, և ԵՄ-ն որևէ բան չի պարտադրում, որևէ համընդհանուր մոդել չկա, պարզապես ցանկանում ենք օգնել՝ կիսվելով փորձով, գործիքներով, ստանդարտներով, հենանիշներով, համեմատության ելակետերով»,- ասաց նա։
Դեսպանն անդրադարձավ նաև կոռուպցիայի դեմ պայքարին և նշեց, որ բավարարված է ՀՀ կառավարության օրենսդրական նախաձեռնություններով.
«Խոսքը վերաբերում է ընտրական կոռուպցիայի, ձայների գնման, վարչական ռեսուրսների չարաշահման, ինչպես նաև՝ սպառնալիքներ օգտագործելու գործընթացների կարգավորման համար ստեղծված նոր օրենսդրական դրույթներին։ Սա ցույց է տալիս, որ մեր երկխոսությունը շարժվում է ճիշտ ուղղությամբ, քանզի վերջին ընտրություններից հետո ԵԱՀԿ-ի հաշվետվության մեջ նշվել է, այս ուղղությամբ բանավեճեր են եղել նաև ԵԽ-ում, եվրոպական այլ հաստատություններում՝ ևս մեկ անգամ փաստելով, որ ՀՀ կառավարությունը, առանց սպասելու հաջորդ ընտրություններին, նախաձեռնողականորեն անցել է խնդրի լուծմանը, ինչը ցույց է տալիս, որ երկխոսությունը կառուցողական է, դրական, և մենք ողջունում ենք այս զարգացումները։
Հավատացած ենք, որ ընդունումից և իրականացումից հետո ընտրությունները կդառնան ավելի մաքուր, արդար և ավելի լավը, ինչը, կարծում եմ՝ բոլոր հայերն ուզում են։ Հետևաբար՝ ես մեծապես խրախուսում եմ դա»։
Պյոտր Սվիտալսկին ասաց, որ ԵՄ-ն աջակցելու է հակակոռուպցիոն նախաձեռնություններին՝ նաև ֆինանսական գործիքներով. «Միջոցառումները, որոնք վերաբերում են կոռուպցիայի դեմ պայքարին, մոտ 20 մլն եվրո ՀՀ բյուջեին աջակցության մի մասն են կազմում։ Այդ մասը վերաբերում է վարչարարության բարելավմանը, պետական կառավարմանը։
Մենք պատրաստ ենք ձեզ օգնել այդ պայքարում։ Կոռուպցիայի դեմ պայքարը չափազանց կարևոր է Հայաստանի ապագայի համար։ Մենք շատ ուրախ ենք, որ հայ իշխանություններն այսօր շատ հաճախ են բարձրացնում այդ հարցը, խոսում են, թե ինչ ծախսեր են անհրաժեշտ այդ նպատակին հասնելու համար, ինչը շատ լավ է, որովհետև կոռուպցիայի խնդիրը Հայաստանում այլևս տաբու չէ, բոլորն ընդունում են, որ այդ խնդիրը կա, քննարկում են դրա լուծման տարբերակները, ինչը ուսուցանելի է այլ երկրների համար։ Նույնիսկ, եթե անհամբեր եք արդյունքների տեսանկյունից, միևնույն է, արդեն օրինակելի փորձ ստեղծել եք։
Ես հավատում եմ, որ դուք այդ ներուժն ունեք՝ հաջողության հասնելու համար։ Հանրությունը պետք է այս ամբողջ նախաձեռնության մասը լինի, միայն կառավարությունը չէ։ Հանրությունը պետք է ստեղծի անհանդուրժողականության միջավայր կոռուպցիայի հանդեպ, առանց դրա որևէ կառավարություն հաջողության չի հասնի, հավատացեք»։
Մենք միանգամայն արժանիորեն դուրս եկանք հաջորդ փուլ
Գանսուի թռչող ձին. չինական նահանգի հնագույն ժառանգություն
Մյունխենի կենտրոնում կառուցվել է փայտից պատրաստված հնգահարկ մանկապարտեզ
ԿԳՄՍՆ-ն՝ ի գիտություն «Սևանի շուրջը» սիրողական հեծանվային արշավին մասնակցությամբ հետաքրքրվողների
Կարլոս Էսպին պայմանագիր է կնքել «Ռեալ Մադրիդի» հետ
Մնացական Սաֆարյանն ու Պորտուգալիայի նորանշանակ դեսպանը քննարկել են երկկողմ համագործակցության օրակարգ...
«Claude» արհեստական բանականությունը թեստավորման ժամանակ կոտրել է 3 ընկերության համակարգեր
Հայաստանի համար Էբոլա հիվանդության ներմուծման և հետագա տարածման ռիսկը գնահատվում է ցածր
Անգլիական ֆուտբոլում խտրականության ցանկացած դրսևորման համար կսահմանվեն 10-խաղյա որակազրկումներ
Գետերի վարարումների ժամանակ առաջացած ավելցուկային ջուրը որոշ դեպքերում անհատույց կտրամադրվի ոռոգման ...