Երևան–Հրազդան երթուղայինի սակագինը 400-ից դարձել է 500 դրամ. տրանսպորտի ոլորտում առաջին թանկացումն է արձանագրվել

Այս տարվա հունվարի 4-ից միջքաղաքային Երևան-Հրազդան երթուղայինի սակագինը 400-ից դարձել է 500 դրամ: Այս տեղեկությունը հաստատած Տրանսպորտի, կապի և տեղեկատվական տեխնոլոգիաների նախարարության մամուլի քարտուղար Անահիտ Առաքելյանը Tert.am-ին հայտնեց նաև, որ այս երթուղին սպասարկող «Վիլ լայն» ընկերությանը լիցենզիայից զրկելու հիմք չկա, քանի որ մրցույթը շահած ընկերությունն ի սկզբանե հայտը ներկայացրած է եղել 500 դրամով: Իսկ 400 դրամով աշխատել է` որպես բարի կամքի դրսևորում:

«Եթե դարձնեին 600, տեղում ընկերությունը կզրկվեր լիցենզիայից, բայց, կրկնում եմ, հայտը եղել է 500 դրամով»,-ասաց Անահիտ Առաքելյանը:

Հիշեցնենք, որ շատ փորձագետներ չէին բացառում, որ հունվարի 1-ից ուժի մեջ մտած Հարկային օրենսգրքով (որով նախատեսվում է նաև սեղմված բնական գազի ու դիզվառելիքի ակցիզների բարձրացում ), կթանկանա նաև քաղաքային ու միջմարզային տրանսպորտը:

Ինչպես հայտնեց ՀՀ ՏԿՏՏ մամուլի խոսնակը՝ այլ ընկերություններից ուղեվարձի թանկացման վերաբերյալ հայտեր չեն ստացվել: