Բնակիչը ենթարկվել է ավազակային հարձակման

ՀՀ քննչական կոմիտեի Երեւան քաղաքի քննչական վարչության Աջափնյակ եւ Դավթաշեն վարչական շրջանների քննչական բաժնում հարուցվել է քրեական գործ՝ Երեւանի բնակչի նկատմամբ ավազակային հարձակում կատարելու դեպքի առթիվ:

ՀՀ Քննչական կոմիտեից հայտնում են, որ 2017թ. դեկտեմբերի 20-ին հաղորդում է ստացվել առ այն, որ նույն օրը՝ ժամը 22:30-ի սահմաններում, Երեւան քաղաքի Աբելյան փողոցի շենքերից մեկի մուտքում դիմակավորված երկու անձ դանակի սպառնալիքով բնակչից հափշտակել են «Այֆոն 6Ս» տեսակի բջջային հեռախոսը, կանխիկ գումար, դրամապանակը, որի մեջ եղել է անձնագիր, բանկային քարտեր եւ այլ փաստաթղթեր:

Հաշվի առնելով, որ հաղորդումն առերեւույթ պարունակում է ենթադրյալ հանցագործության հատկանիշներ՝ դեպքի առթիվ ՀՀ ՔԿ ԵՔՔՎ Աջափնյակ եւ Դավթաշեն վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 175-րդ հոդվածի 2-րդ մասի 1-ին եւ 2-րդ կետերով եւ 324-րդ հոդվածի 1-ին մասով, տղամարդը ճանաչվել է տուժող եւ հարցաքննվել, կատարվել դեպքի վայրի զննություն:

Հանձնարարություն է տրվել ոստիկանության համապատասխան ստորաբաժանումներին՝ ենթադրյալ հանցագործություն կատարած անձանց հայտնաբերելու, վարույթն իրականացնող մարմնին ներկայացնելու ուղղությամբ, եւ ձեռնարկվում են անհրաժեշտ քննչական միջոցառումներ՝ պարզելու դեպքի բոլոր հանգամանքները: