Ղազախստանում խուզարկություններ են անցկացվել Orda.kz-ի խմբագրությունում և պարբերականի գլխավոր խմբագրի տանը

Խուզարկություններ են ընթանում ղազախական Orda.kz պարբերականի հիմնադիր և գլխավոր խմբագիր Գուլնարա Բաժկենովայի Ալմաթիի բնակարանում, ինչպես նաև խմբագրությունում: Այս մասին հայտնել է պարբերականը և «Ազատություն» ռադիոկայանին հաստատել է քաղաքային ոստիկանության բաժանմունքը:

«Մենք չգիտենք, թե ով է կատարում քննչական գործողությունները, որ հոդվածով է հարուցվել քրեական գործը և ում նկատմամբ։ Խմբի ղեկավարը ոչ մի հարցի չի պատասխանում»,— հայտարարել է խմբագրության իրավաբան Օլգա Դիդենկոն։

Ոստիկանությունը հայտնել է, որ «ստացված հայտարարությունների» հիման վրա քրեական գործեր են հարուցվել «Օ. ռեսուրսի գլխավոր խմբագրի, քաղաքացի Բ.»-ի դեմ՝ «գիտակցաբար կեղծ տեղեկատվության բազմակի և միտումնավոր տարածման համար»։

Ոստիկանության տվյալներով՝ 2024 թվականի մեկ հրապարակում կեղծ տեղեկություններ է պարունակել կաշառք վերցնելիս իրավապահ մարմինների աշխատակցի ձերբակալման մասին, չնայած «այս միջադեպը երբեք տեղի չի ունեցել»։ Ոստիկանության վարչությունը հայտարարել է, որ մեկ այլ հոդված պարունակել է «գույքային վեճի ժամանակ պատճառված վնասի վերաբերյալ աղավաղված տվյալներ»։

Գուլնարա Բաժկենովան ղազախստանցի լրագրող և մեդիա մենեջեր է։ 2020 թվականին նա հիմնադրել է Orda.kz պարբերականը, որը լուսաբանում է երկրի և ամբողջ աշխարհի սոցիալ-քաղաքական իրավիճակը։

«Ազատություն ռադիոն» հիշեցնում է, որ 2025 թվականի սեպտեմբերի սկզբին Orda.kz-ը հայտնել էր Ղազախստանի արտաքին գործերի նախարար Մուրատ Նուրտլեուի ձերբակալության մասին։ Պարբերականի աղբյուրը պնդում է, որ ձերբակալվել են նաև գործարար Հաջի Հաջիևը և Ղազախստանի Ազգային անվտանգության կոմիտեի մի քանի բարձրաստիճան աշխատակիցներ։ Շուտով իշխանություններն հերքել են այդ տեղեկությունը։ Մի քանի օր անց Նուրտլեուն այցելեց Ղազախստանի խորհրդարան։ Սեպտեմբերի վերջին Ղազախստանի նախագահ Կասիմ-Ժոմարտ Տոկաևը նրան ազատել է պաշտոնից և նշանակել իր օգնական։