ԵԱՀԿ-ն հայտնում է Մինսկի գործընթացի և կից կառուցակարգերի լուծարման ավարտի մասին

ԵԱՀԿ-ն ավարտել է Մինսկի գործընթացի և դրան առնչվող կառույցների փակումը։

ԵԱՀԿ-ն տարածել է հայտարարություն, որում ասվում է.

«ԵԱՀԿ-ն 2025 թվականի նոյեմբերի 30-ին, ժամը 23:59-ին, ավարտեց Մինսկի գործընթացի և դրա հետ կապված կառույցների փակումը, համաձայն Նախարարների խորհրդի MC.DEC/1/25 որոշման, որն ընդունվել էր 2025 թվականի սեպտեմբերի 1-ին՝ ԵԱՀԿ-ում Ֆինլանդիայի նախագահությանը ուղղված Հայաստանի և Ադրբեջանի համատեղ դիմումից հետո։

Բոլոր անհրաժեշտ վարչական ընթացակարգերի լուծարումը նշանակում է փակման գործընթացի ավարտը։ Այս գործընթացն իրականացվեց ԵԱՀԿ բոլոր 57 մասնակից պետությունների սեպտեմբերի 1-ի կոնսենսուսային որոշմամբ՝ 2025 թվականի օգոստոսի 8-ին Վաշինգտոնում ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի կողմից ստորագրված պատմական համատեղ հռչակագրից հետո, որին ներկա էր նաև ԱՄՆ նախագահ Դոնալդ Թրամփը»։ 

Օգոստոսի 8-ին, Վաշինգտոնում ԱՄՆ նախագահ Դոնալդ Թրամփի հետ  Նիկոլ Փաշինյանի և Ադրբեջանի նախագահ Իլհամ Ալիևի կողմից ստորագրված համատեղ հռչակագրի կետերից մեկով նշվում է. «Մենք ականատես եղանք նաև Հայաստանի Հանրապետության և Ադրբեջանի Հանրապետության արտաքին գործերի նախարարների կողմից Եվրոպայում անվտանգության և համագործակցության կազմակերպությանն (ԵԱՀԿ) ուղղված՝ ԵԱՀԿ Մինսկի գործընթացի և կից կառուցակարգերի լուծարման վերաբերյալ համատեղ դիմումի ստորագրմանը։ Մենք կոչ ենք անում ԵԱՀԿ բոլոր մասնակից պետություններին ընդունել այս որոշումը»։ 

Հիշեցնենք, որ ԵԱՀԿ Մինսկի խումբը գլխավորում էր Արցախյան հակամարտության խնդրի խաղաղ լուծման գործընթացը։

Խմբի ձևավորման մասին որոշումը ընդունել է ԵԱՀԿ անդամ պետությունների նախարարների խորհուրդը 1992 թվականի մարտի 24-ին։ Անվանումը պայմանավորված է ենթադրյալ խաղաղ կոնֆերանսի անցկացման վայրով։ Սկզբնապես խումբը բաղկացած էր 9 երկրներից, ինչպես նաև  Հայաստանի և Ադրբեջանի ներկայացուցիչներից։