Հանրային լսումներ՝ Կարմիր սարի կրաքարային մերգելների հանքարդյունահանման թեմայով

Վեդի խոշորացված համայնքի Գինեվետ բնակավայրում այսօր անցկացվեց հանրային լսումներ՝ Կարմիր սարի կրաքարային մերգելների հանքարդյունահանման թեմայով։ Լսումներն անցավ թեժ մթնոլորտում: Գյուղացիները և բնապահպանները, ովքեր դեմ են հանքի շահագործմանը , պահանջում են դադարեցնել գործընթացը:

Հանքարդյունահանող «Օրդ» գրուպ ՍՊԸ-ն նախկինում մեկ այլ անվամբ (Օրդ ՍՊԸ) նույնպես փորձել էր հանքարդյունահանման թույլտվություն ստանալ, սակայն մերժվել էր Շրջակա միջավայրի նախարարության ՇՄԱԳ փորձաքննական կենտրոնի կողմից։

Կրաքարային մերգելը, որը ցանկանում է ընկերությունն արդյունահանել, ծառայում է որպես հումք՝ ցեմենտի համար։ Ընկերությունը, Շրջակա միջավայրի փորձաքննական կենտրոնին ներկայացրած մեկ այլ ծրագրով, պատրաստվում է կառուցել նաև ցեմենտի գործարան։

Լսումներին բացի գինեվետցիներից ներկա էին նաև հարակից բնակավայրերի բնակիչներ, տեղական ինքնակառավարման մարմինների ներկայացուցիչներ, ոստիկաններ և հանքարդյունահանող «Օրդ» գրուպ ՍՊԸ-ի աշխատակիցներ։