Էլեկտրոնային դեղատոմսերի պետք է անցնենք, որ հակաբիոտիկների, հորմոնալ դեղամիջոցների անհարկի օգտագործում չունենանք. Ավանեսյան

2025 թվականին ամբողջապես գնալու ենք թվայնացված էպիկրիզների: Այս մասին հրավիրված մամուլի ասուլիսի ժամանակ հայտարարեց առողջապահության նախարար Անահիտ Ավանեսյանը:

«Ընդհանուր առողջապահական որակի բարձրացման համար թվայնացումն ունի չափազանց կարևոր նշանակութոյւն: Այս տարի մենք ամբողջապես գնալու ենք թվայնացված էպիկրիզների, որի միայն հիման վրա ենք փոխհատուցումներն իրականացնելու: Այո, դա նշանակում է լրացուցիչ հմտությունների, գիտելիքների ձեռքբերում, բայց եթե մենք չգնանաք թվայնացման, մենք չենք կարող խոսել ո՛չ ֆինանսական միջոցների էֆեկտիվ օգտագործման, ո՛չ էլ հենց առողջական ցուցանիշների բարելավման մասով»,- ասաց Ավանեսյանը:

Նախարարը կարևորեց նաև էլեկտրոնային դեղատոմսերին անցնելու գործընթացը:

«Անընդհատ աշխատանքի մեջ ենք գտնվում թե բժշկական հաստատությունների, թե դեղատների հետ: Էլեկտրոնային դեղատմոս դուրս գրելը և դեղատոմսով բացթողումը տնտեսվարողի վրա որևէ ֆինանսական հավելյալ ծախս չի ենթադրում: Այսինքն, դեղատունը որևէ շահագրգռվածություն այս մասով չունի, որ չհետևի էլկետրոնային դեղատոմսի կանոնին:

Տեխնիկապես դեղատոմս դուրս գրելը 2-3 րոպե կտևի: Այս պահին մենք ևս վեց ամսով հետաձգեցինք դեղերի խմբերի ավելացումը, որպես միայն էլեկտերոնային դեղատոմսով դուրս գրման: Ժամանակ ենք տալիս, որպեսզի թե քաղաքացիները, թե ԲԿ-ները, թե դեղատները հետևեն այս կանոներին»,- ասաց նա:

Նախարարի խոսքով՝ դա կապահովի, որ հակաբիոտիկների, հորմոնալ դեղամիջոցների անհարկի օգտագործում չունենանք: «Դա կապահովի, որ հորմոնալ դեղամիջոցների և հակաբիոտիկների անհարկի չարաշահում չունենանք և իրավիճակում չհայտնվենք, որ հինգ տարի հետո թոքաբորբից մահեր կունենանք, որովհետև հակաբիոտիկները չեն օգնի: Տեխնիկական որևէ խոչընդոտ չկա, որ մենք էլեկտրոնային դեղատոմսին չհետևենք»,- շեշտեց նա: