ԱՄՆ կոնգրեսականը Պուտինի դիմակով է ներկայացել Բայդենի հարցով լսումներին (տեսանյութ)
ԱՄՆ Կոնգրեսի Ներկայացուցիչների պալատի դեմոկրատ անդամ Ջարեդ Մոսկովիցն ԱՄՆ նախագահ Ջո Բայդենի և նրա ընտանիքի դեմ գործով լսումներին ներկայացել է ՌԴ նախագահ Վլադիմիր Պուտինի ռետինե դիմակով, գրում է The Hill-ը։
Լսումները տեղի են ունեցել Ներկայացուցիչների պալատի Վերահսկողության և հաշվետվողականության հանձնաժողովում:
Մոսկովիցը, խոսելով «Պուտինի անունից», լրագրողներին ասել է, որ եկել է հանձնաժողով՝ շնորհակալություն հայտնելու հանձնաժողովի հանրապետական նախագահ Ջեյմս Քոմերին:
Ավելի ուշ Մոսկովիցը բացատրել է իր տարօրինակ քայլը. «Ներկայացուցիչների պալատում մեծամասնություն կազմող հանրապետականները Ջո Բայդենի նկատմամբ հետաքննություն են սկսել՝ օգտագործելով 1023 ձևը, որն այժմ ապացուցված է, որ ուղղակիորեն ռուսական հետախուզությունից է ստացվել: Ջեյմս Քոմերը կատարում էր Վլադիմիր Պուտինի հրամանը: Ես դիմակը կրել եմ զուտ տեսողական էֆեկտն ապահովելու համար»,- ասել է կոնգրեսականը։
Ներկայացուցիչների պալատը պաշտոնապես հետաքննություն է վարում նախագահ Բայդենի և նրա ընտանիքի դեմ 2023 թվականի դեկտեմբերից։ Ընթացակարգի շրջանակում կոնգրեսականներն աշխատում են կոռուպցիայի և իշխանության չարաշահման ապացույցներ հավաքելու ուղղությամբ: Մասնավորապես, հանրապետականները կասկածում են, որ ԱՄՆ առաջնորդն անձնական շահ է ունեցել որդու՝ Հանթեր Բայդենի՝ օտարերկրյա գործընկերների, այդ թվում՝ ուկրաինացիների հետ գործարքներից։