Այո΄, ես ինձ համարում եմ ռեւանշիստ. Տավուշի թեմի առաջնորդ

Այո, ես ինձ համարում եմ ռեւանշիստ, եւ այդպես եմ ապրելու մինչեւ կյանքիս վերջին վայրկյանը: Այս մասին կիրակնօրյա իր քարոզի ժամանակա ասել է Տավուշի թեմի առաջնորդ Բագրատ Արքեպիսկոպոս Գալստանյանը:

«Որովհետեւ այն ուղղված չէ կողոպտելու մեր կյանքը, թե΄ հոգեւոր իմաստով, թե΄ բարոյական իմաստով, եւ թե ֆիզիկական իմաստով: Այն ուղղված չէ անընդհատ ծնկած, սողալով ման գալուն, այլ ընդհակառակը վեր կանգնել եւ մեր Տիրոջ առաջ կանգնելով ասել, ավելացրու իմ հավատը, որպեսզի կարողանամ քո գործը կատարեմ երկրի վրա: Եւ մենք այդպես պիտի մտածենք, որ մենք Աստծո գործն ենք կատարում երկրի վրա՝ արդարության, ճշմարտության եւ փրկության վերահաստատումը: Եւ այո, այդ ճանապարհը վրեժի ճանապարհն է, ուրիշ ի՞նչ ճանապարհ կա տունը վերականգնելու: Դա ատելություն չի ենթադրում, ընդհակառակը՝ դա ենթադրում է սեր, դա ենթադրում է նվիրում, ենթադրում է անսպառ հավատ, մեծագույն հույս, զոհաբերություն, քաջություն եւ բոլոր առաքինությունները եւ ոչ հակառակը: Չի կարող լինել մարդ, որի ամբողջ ներաշխարհը տակնուվրա է արված ու նա կարողանա հանգիստ ապրել: Մեզ կարող եք մեղադրել, որ մենք անընդհատ խոսում ենք, բայց անընդհատը չի փոխել մեր իրականությունը եւ դեռ ավելին է խորացել եւ դեռ ավելին է խորանալու: Եւ այս հատուցումը պետք է տեղի ունենա, որովհետեւ մեր կյանքերի համար հազարավոր մարդիկ իրենց կյանքն են ընծայել»,-ասում է նա:

Բագրատ Սրբազանը իր քարոզում նշում է, որ ընդամենը մի քանի տարաի առաջ ուրախ ապրում էին Արցախ աշխարհում, մեծով, փոքրով ուխտագնացության էին գնում. «Մեզ համար նվաճված քաղցրություն էր եւ այդպես էլ պետք է դառնա: Վայ նրանց, ասում է մեր Տեր Հիսուսը, որոնց ձեռքով եկել է այդ գայթակղությունը եւ իմ հատուցումն էլ չի ուշանալու, ասում է Տեր Աստված, միայն թե դուք կոչված եք փոխվելու, վերադառնալու: Մեզ համար ամենօրյա մտածում պետք է դառնա մեր տան վերականգնումը»: