ArtsakhX-ը կաշխատի անգամ ինտերնետի անջատման դեպքում

Արցախի կառավարության և Zangi ընկերության միջև ստորգրվել է հուշագիր՝ կապի ժամանակակից և պաշտպանված համակարգ ստեղծելու մասին։ Պրոյեկտը կանվանվի ArtsakhX։ Ընկերության գլխավոր տնօրեն Վահրամ Մարտիրոսյանի փոխանցմամբ՝ աշխատանքները դեռ 6 ամիս առաջ են սկսել և համակարգը շատ շուտով հասանելի կլինի բոլոր արցախցիների համար։ ArtsakhX-ը ունի հետևյալ առանձնահատկությունները՝

-Կոդավորված է ՆԱՏՕ-ի կողմից հաստատված Military Grade End-to-End AES-GSM-256 ալգորիթմով։

-Սերվերները և ամբողջ տվյալները գտնվելու են Արցախի Հանրապետության տարածքում։

-Արցախի ինտերնետից անջատման դեպքում շարունակելու է աշխատել ապահովելով կապ Արցախի ներսում։

-Թշնամու կողմից ՌԵՊ ռադիոէլեկտրոնային համակարգերով կապի ճնշման և նրա վատացման պայմաններում կարողանում է ապահովել տվյալների փոխանցում։

ArtsakhX-ը աշխարհում եզակի լուծում է, որը իրականացնում է քաղաքացիական GSM օպերատորի և մեսենջերային համակարգի ինտեգրացիա: Այն թույլ է տալիս ռազմականացնել քաղաքացիական ենթակառուցվածքները։ ArtsakhX-ը ստեղծվել և սպասարկվելու է Zangi ընկերության կողմից ամբողջովին անհատույց սկզբունքներով։