Ադրբեջանում ընդունում են Արցախի շրջափակումը եւ փորձում Արցախին վառելիքով ապահովման մեջ «մեղադրել» խաղաղապահներին

Ադրբեջանում անուղղակիորեն ընդունել են Արցախի Հանրապետության շրջափակումը եւ փորձել մեղադրել ռուս խաղաղապահներին հանրապետությանը վառելիքով ապահովելու մեջ։

Ադրբեջանի կառավարամետ haqqin.az պարբերականը հրապարակել է այն «հետազոտության» արդյունքները, որի համաձայն՝ «բնապահպանների» ակցիան սկսվելուց մեկ ամիս առաջ Հայաստանից Ստեփանակերտ վառելիք է տեղափոխել միջինը 9-15 մեքենա, հունվարին՝ մոտ չորս անգամ ավելի՝ վառելիք տեղափոխող 58 մեքենա։

«Նշված թվերը հիմք են տալիս ենթադրելու, որ ղարաբաղցի անջատողականների վառելիքի պահանջմունքն ապահովվում է ի հաշիվ ռուս խաղաղապահների զորակազմի, եւ ասելու, որ վառելիքի հետ կապված խնդիրներ չկան»,- նշել է պարբերականը։

Այսպիսով, Բաքվում հաստատել են, որ Լաչինի միջանցքն արգելափակված է, եւ վառելիքը Արցախի Հանրապետություն կարող է հասցվել բացառապես ռուսական խաղաղապահ զորակազմի ուժերով։