Տեն Հագ․ Ռոնալդուի հետ ամեն ինչ քննարկել ենք, բոլոր խնդիրները լուծված են

Անգլիական «Մանչեսթեր Յունայթեդի» հոլանդացի գլխավոր մարզիչ Էրիկ տեն Հագը մեկնաբանել է 37-ամյա պորտուգալացի հարձակվող Կրիշտիանու Ռոնալդուի վերադարձը հիմնական կազմ։

«Ոչ մի խնդիր չկա։ Ռոնալդուի հետ ամեն ինչ քննարկել ենք, բոլոր խնդիրները լուծված են։ Նա բաց է թողել մեկ հանդիպում եւ վերադարձել է կազմ, ոչ մի անսովոր բան չկա։ Այլեւս չենք մեկնաբանի այդ դրվագը, քանի որ պետք է կենտրոնանանք առաջիկա հանդիպման վրա։ Կարեւոր խաղ է, քանի որ ցանկանում ենք խմբում գրավել առաջին տեղը»,- Տեն Հագի խոսքը մեջբերում է ակումբի մամուլի ծառայությունը։

Եվրոպայի լիգայի խմբային փուլի նախավերջին տուրի «Մանչեսթեր Յունայթեդ» - «Շերիֆ» հանդիպումը տեղի կունենա հոկտեմբերի 27-ին եւ կմեկնարկի Երեւանի ժամանակով 23:00-ին։

E խմբում «Մանչեսթեր Յունայթեդը» 9 միավորով երկրորդն է եւ փլեյ-օֆֆի ուղեգիրն ապահոված իսպանական «Ռեալ Սոսիեդադից» հետ է 3 միավոր։ «Շերիֆը» երրորդն է՝ 3 միավոր։