Պոչետինո․ Անհավանական է, որ սուլում են Մեսիին

Ֆրանսիայի չեմպիոնի տիտղոսը նվաճած ՊՍԺ-ի արգենտինացի գլխավոր մարզիչ Մաուրիսիո Պոչետինոն անդրադարձել է փարիզյան թիմի երկրպագուներին, որոնք «Լանսի» դեմ 34-րդ տուրի հանդիպման (1։1) ժամանակ դարձյալ սուլել էին արգենտինացի հարձակվող Լիոնել Մեսիին։ 34-ամյա ֆուտբոլիստը գոլի հեղինակ էր դարձել այդ խաղում։

«Անհավանական է, որ սուլում են Մեսիին, մյուս ֆուտբոլիստներին։ Բարդ է ընդունել այդպիսի վարքը։ Անհասկանալի իրավիճակ է՝ հաշվի առնելով Մեսիի մեծությունը, այն ամենը, ինչ Լեոն տալիս է ֆուտբոլին եւ կշարունակի առաջիկա տարիներին»,- Պոչետինոյի խոսքը մեջբերում է RMC Sport-ը։

Ֆրանսիայի առաջնությունում Մեսին մասնակցել է 22 հանդիպման, խփել 4 գոլ, կատարել 13 գոլային փոխանցում։ Նա 11-րդ չեմպիոնական տիտղոսը նվաճեց կարիերայում «Բարսելոնայի» հետ 10 չեմպիոնությունից հետո։