ԵԱ. Հրայր Ալիխանյանը դուրս եկավ քառորդ եզրափակիչ

Ազատ ոճի ըմբշամարտի աշխարհի Մ-23 առաջնության բրոնզե, Եվրոպայի Մ-23 առաջնության արծաթե մեդալակիր Հրայր Ալիխանյանը Բուդապեշտում ընթացող Եվրոպայի առաջնության մեկնարկային գոտեմարտում տեխնիկական հաղթանակ գրանցեց եւ դուրս եկավ քառորդ եզրափակիչ:

74 կգ քաշայինների 1/8 եզրափակիչում հայ ըմբիշը մրցեց սերբ Հետիկ Կաբոլովի հետ: Առաջին մրցափուլում Հայաստանի ներկայացուցիչը 4 միավոր վաստակեց: Սերբ ըմբիշը մեկնարկից աշխատում էր միայն աջ ձեռքով՝ փորձելով պահել ձախը: Գորգի մրցավարը նկատեց եւ առաջին մրցափուլի ավարտից վայրկյաններ առաջ կանգնեցրեց գոտեմարտը: Հրավիրվեց բժիշկ, որը գորգի մրցավարի հետ որոշեց չշարունակել գոտեմարտը: Հաղթանակը տրվեց Հրայր Ալիխանյանին՝ 4:0 հաշվով:

Քիչ անց մրցագորգ դուրս կգան նաեւ Արսեն Հարությունյանը (61 կգ) եւ Հովհաննես Մխիթարյանը (92 կգ): Երկու ըմբիշներն էլ պայքարը սկսելու են քառորդ եզրափակիչից:

Ազատ ոճի ըմբշամարտի աշխարհի բրոնզե մեդալակիր, Եվրոպայի չեմպիոն, Մ-23 աշխարհի չեմպիոն Արսեն Հարությունյանը կմեկնարկի քառորդ եզրափակիչից: Նրա մրցակիցը կիլինի մակեդոնացի Բեսիր Ալիլին:

Հովհաննես Մխիթարյանը քառորդ եզրափակիչում կմրցի վրացի Միրիանի Մայսուրաձեի հետ:

Երեկոյան մրցահերթում Հաբեթնակ Կուրղինյանի գլխավորած հավաքականից երեք ներկայացուցիչ կպայքարի մեդալի համար:

Եվրոպայի չեմպիոնի տիտղոսի համար գոտեմարտ կանցկացնի 70 կգ քաշային Արման Անդրեասյանը: Հայ ըմբիշը ոսկե մեդալի համար պայքարում կգոտեմարտի 2017 թվականի աշխարհի չեմպիոն, կրկնակի աշխարհի եւ Եվրոպայի բրոնզե մեդալակիր Վրաստանի ներկայացուցիչ Զուրաբ Յակոբիշվիլիի հետ:

57 կգ քաշայինների բրոնզե մեդալի համար պայքարում Հայաստանի ներկայացուցիչ Մանվել Խնձրցյանը ուժեղրը կչափի գերմանացի Նիկլաս Ստեչելի հետ:

79 կգ քաշայինների բրոնզե մեդալի համար գոտեմարտում Արման Ավագյանը կմրցի Վրաստանի ներկայացուցիչ Վլադիմիր Գամկրելիձեի հետ: