Թանկացումներ կարձանագրվեն նաև ՀՀ դեղագործական ոլորտում․ Առողջապահության կառավարման փորձագետ

«Չնայած Ռուսաստանի Դաշնության դեմ ԵՄ-ի և ԱՄՆ-ի պատժամիջոցները չեն ազդել դեղագործական արդյունաբերության վրա, այդուհանդերձ, ռուսական ընկերությունները կարող են մնալ առանց ներմուծվող հումքի և բաղադրիչների»,- գրել է «Կոմերսանտ»-ը՝ տեղեկացնելով, որ Եվրոպան մեկ շաբաթվա ընթացքում գրեթե դադարեցրել է նյութերի մատակարարումը, իսկ Չինաստանից և Հնդկաստանից դրանց ներմուծումը, ինչը կազմում է ներմուծվող հումքի ընդհանուր ծավալի շուրջ 80%-ը, խոչընդոտվում է մատակարարման շղթաների խիստ խախտմամբ:

Ռուսաստանում ներկրվող դեղագործական նյութերը վերջին 10 օրվա ընթացքում թանկացել են 30-35%-ով, այդ թվում՝ ռուբլու կտրուկ արժեզրկման պատճառով: ՌԴ դեղագործական ընկերությունները նշում են՝ Եվրոպայից մատակարարումներն անհեռանկարային են՝ նաև վճարումներ կատարելու բարդություններով պայմանավորված:

Առողջապահության կառավարման փորձագետ Սամվել Սողոմոնյանի կարծիքով՝ այս իրավիճակով պայմանավորված՝ թանկացումներ կարձանագրվեն նաև Հայաստանի դեղագործական ոլորտում:

168.am-ի հետ զրույցում դեղորայքի շուկայում գնագոյացման հիմնական բաղադրիչներին անդրադառնալով՝ փորձագետը նկատեց.

«Տեղում արտադրվող դեղորայքի հումքի թանկացումն անխուսափելի է, իսկ դեղորայքը, որը ներմուծվում է ռուսական շուկայից, կթանկանա, որովհետև ռուբլու ու դոլարի հարաբերության խնդիր կա. եթե ներմուծման գինը պայմանագրով ֆիքսվել է դոլարով, ապա, բնականաբար, կթանկանա նաև ՌԴ-ից ներմուծվող դեղորայքի գինը»:

Դիտարկմանը, թե դա վերաբերում է միայն Ռուսաստանի՞ց ներկրվող նյութերին, նա արձագանքեց, որ եթե նույնիսկ ՌԴ-ից չենք ներկրում, այլ, օրինակ, Հարավային Կորեայից, ապա, միևնույն է՝ լոգիստիկ խնդիրները, որոնք առաջացել են ՌԴ օդային տարածքի փակման հետ կապված, անխուսափելիորեն անդրադառնալու են նաև Հայաստանի վրա:

Սամվել Սողոմոնյանը դրամի արժեզրկման պարագայում չբացառեց նաև Եվրոպայից ներկրվող դեղորայքի թանկացումը: