Փաշինյանը օգնել է, որպեսզի Շուշին ու Հադրութն անցնեն Ադրբեջանի վերահսկողության տակ

Գրել էինք, որ Երեւան քաղաքի առաջին ատյանի ընդհանուր իրավասության դատարանի Կենտրոն նստավայրում  այժմ քննվում է ՀՅԴ անդամ Արծվիկ Մինասյանի ու փաստաբան Հակոբ Մարտիրոսյանի հայցն ընդդեմ ՀՀ գլխավոր դատախազության անգործության, նրանք պահանջում են քրեական գործ հարուցել ՀՀ վարչապետի պաշտոնակատար Նիկոլ Փաշինյանի նկատմամբ։

«ՀՀ քաղաքացի և վարչապետի պաշտոնը զբաղեցրած Նիկոլ Փաշինյանը առերևույթ կատարել է առանձնապես ծանր հանցագործություն՝ պետական դավաճանություն, այդպիսի արարք նախատեսված է ՀՀ քրեական օրենսգրքի 299-րդ հոդվածի առաջին մասով։  Փաշինյանը ուղղակի դիտավորությամբ կատարել է արարքներ, որով օգնել է Ադրբեջանի Հանրապետությանը, որպեսզի վերջինիս կողմից Արցախի Հանրապետության դեմ իրականացված թշնամական գործունեության արդյունքներով Ադրբեջանի Հանրապետության վերահսկողության ներքո վերադառնա հայկական զինված ուժերի կողմից նախկինում ազատագրված՝ Արցախի տարածքային ամբողջականության մաս կազմած տարածքներ, այդ թվում Հադրութի շրջանը և Շուշի քաղաքը»,-իր ելույթի ընթացքում ասաց փաստաբան Հակոբ Մաթեւոսյանը։

Մարտիրոսյանը պնդում է՝ Փաշինյանը Սահմանադրությամբ և օրենսդրությամբ լիազորված չլինելով առանց ՀՀ Ազգային Ժողովի վավերացման և առանց սահմանադրական դատարանի եզրակացության կնքելու միջազգային պայմանագիր, անցած տարվա նոյեմբերի 9-ին Ադրբեջանի  ու Ռուսաստանի  նախագահների հետ համատեղ ստորագրել է միջազգային պայմանագրերի իրավունքի մասին ՄԱԿ-ի 1969 թվականի   կոնվենցիայով և միջազգային պայմանագրերի մասին օրենքով որպես միջազգային պայմանագիր գնահատվող հայտարարությունը։